Kooperasyon gikinahanglan

Morag daghan kanato ang nakalimot sa ubang mga panghitabo karong panahona. Semana Santa na man diay ug usa kini sa labing balaan nga panahon alang sa mga Kristiyano, ilabina niadtong mga sakop sa Romano Katoliko.

Kagahapon mao ang Palm Sunday, ang panahon sa pagsaulog sa madaugong pagsulod ni Jesu Kristo sa Jerusalem. Usa kini ka importante nga panghitabo alang sa mga Kristiyanos tungod kay signal kini sa mas dagko pang panghitabo sa kinabuhi ni Kristo sa dinhi pa siya sa kalibotan.

Sa umaabot nga mga adlaw sulod niining semana, ato usab nga i-obserbar ang pait nga pagkamatay ni Jesu Kristo sa kamot sa mga sundalong Romano ibabaw sa krus ug ang Iyang pagkabanhaw human sa tulo ka adlaw.

Dinhi sa Pilipinas, sulod na sa gatusan ka tuig nga gioberbar sa mga Pilipino ang Semana Santa. Gani, usa kini sa labing importante nga relihiyosong katiguman matag tuig sa nasud nga kabahin sa dakong kabilin sa mga Katsila.

Apan mingaw ang obserbasyon sa mga Pilipinhong Katoliko sa Semana Santa karong tuiga. Kini tungod lagi sa makahahadlok nga virus nga mikatap ug miigo na sa kapin usa ka milyon ug mipatay sa liboan ka tawo sa kalibotan.

Kay gidili na lagi sa kagamhanan ang panagtigum sa mga tawo, ilabina sa mga pangpublikong lugar, gikanselar sa kadagkoan sa Simbahang Katoliko ang unsa mang kalihokan nga may kalabotan sa Semana Santa.

Tungod sa social distancing ug Enhanced Community Quarantine sa kagamhanan nga gitumong paghunong sa makamatay nga Coronavirus Disease o COVID-19, putol tanang kalihokan sa gawas, lakip ang kadtong may kalabotan sa Semana Santa. Mao nang giawhag sa liderato sa Simbahang Katoliko ang mga parokyano pag-obserbar sa Semana Santa diha lamang sulod sa tagsatagsa nila ka panimalay. Kini isip kabahin sa kampanya batok sa pagkuyanap sa maong balatian.

Hinuon labing maayo nga motuman kita sa mando sa kagamhanan paghikling una sa atong nga public activities. Niining panahon sa krisis sa coronavirus, gikinahanglan gayud ang kooperasyon sa matag usa kanato. Kining pagpuyo una sa atong panimalay dako kaayo kini nga tabang sa paningkamot sa nasudnong pangagamhanan nga makontrolar ang pagkatap sa maong balatian. Dako ang tsansa nga ato kining mapukan. Basta mokooperar lamang ang tanan.