Kanunay lang nga iwit
Duha ka mahinungdanong pahibawo mahitungod sa hiningusgang kampanya sa pamunoan ni Presidente Rodrigo Duterte batok sa Covid-19 nga nahilambigit sa pagpangita sa dugang mga pasyente nga nataptan sa kagaw ug sa kalibotanong pagtuon og tambal sa sakit:
Sugdan nang mas lapad nga testing sa Covid-19 nga maglakip sa tanang patients under investigation (PUIs) ug persons under monitoring (PUMs) apil nang di grabe ang kahimtang; ug
Pagsalmot sa Solidarity trial sa World Health Organization (WHO) sa dul-an gatos ka nasud pagtuon sa upat ka tambal nga nagpakitang epektibo batok sa Covid-19.
* * *
Samtang angayng hangpon ang mga pahibawo, nga pulos nisukwahi sa orihinal nga baruganan sa pamunoan, makapahibung nga di ang kadagkoan sa Department of Health (DOH) ang nihimo sa pahibawo.
Kon dili ang retiradong heneral nga si Carlito Galvez Jr., ang gitudlo ni Presidente Duterte nga chief implementer sa kampanya batok sa Covid-19.
Nagmatuod ba ni nga nawani na gyod si Health Secretary Francisco Duque III sa liderato sa kampanya?
O gipatigbabaw lang gihapon ni Duque ang iyang garbo sa pag-insistir sa orihinal niyang baruganan pagsupak sa mass testing ug Solidarity trial?
* * *
Si Duque maoy nipatuman sa lagda nga ang ipaubos sa Covid-19 testing mao ra ang mga pasyente nga grabe na ang kahimtang, may gihambing daan nga mga sakit, senior citizens ug mga babayeng tandugon ang pagmabdos.
Gikuwestiyon ang lagda ni Duque atubangan sa tambag sa WHO nga epektibong mabadlong ang Covid-19 pinaagi sa lapad nga testing, bisan sa mild cases.
Nisamot kakuwestiyonable ang lagda dihang iyang gitugotan ang testing sa gamhanang mga politiko nga way timaan sa sakit.
* * *
Ang DOH sab ang nanagana pag-apil sa Solidarity trial batok sa Covid-19. Kini bisan sa pagdapit ug pagpasabot sa WHO nga kon mas daghang nasud nga mosalmot mas daghan ang kasayuran nga mahipos mahitungod sa katakos sa upat ka masaaron nga mga tambal ug mas dali nga makaplagan ang tambal batok sa sakit.
Maong way apil ang Pilipinas sa unang 45 ka nasud nga niapil sa Solidarity trial. Wa say apil sa dugang 30 ka nasud nga niapas. Sama sa naandan, kita na sab ang usa sa iwit sa kalibotanong kampanya.
* * *
- Latest
