Pagpakiluoy mo

Kon manghatag karon og cash assistance sa mga senior citizens dinhi sa Dakbayan sa Sugbo samtang gipatuman pa ang Enhanced Community Quarantine, sigurado nga daghan kaayo ang dili makadawat kay sila tua man magpuyo sa mga dapit gawas sa siyudad.

Aw, hinoon, ang maong mga senior citizens makahimo man pag-anhi sa siyudad kon may passes sila nga mapakita sa mga polis nga nag-checkpoint sa mga karsada nga anha sila moagi pagsulod nila sa dakbayan.

Dinhi sa siyudad, dunay kapin sa 82,000 ka senior citizens nga gitagan-an og cash assistance nga tag P1,000 kada buwan, apan pananglit dili kini makuha sulod sa napulo ka adlaw gikan sa pagpanghatag, ang kuwarta mobalik sa panudlanan sa City Hall ug dili na makobra pa.

Ang mahimo sa mga senior citizens mao ra gyud ni. Magpakiluoy sila ni Mayor Edgar Labella nga dili lang i-forfeit ang ilang cash assistance kon dili kini makuha samtang gipatuman pa ang quarantine.

Nagtuo ko nga maglisud ang mga opisyal ug kawani sa Cebu City Hall kon ipanghatud nila sa kabalayan sa mga senior citizens ang cash assistance. Unya, kon ipanghatud sab sa kabalayan sa mga senior citizens, dili man ihatag ang kuwarta kon wa diha ang hingtungdan.

Pero mahimo ra man tingali nga unya na lang manghatag og cash assistance ang mga opisyal sa siyudad inighuman na sa quarantine.

* * *

Paniid nako, mora’g lugwayan pa sa atong mga opisyal sa kagamhanan ang pagpatuman og quarantine tungod kay padayon pa man nga nagsaka ang gidaghanon sa Coronavirus Disease kada adlaw.

Kada adlaw dunay “average” gikan sa 300 ngadto sa 500 ang mga kaso sa Covid-19 nga madugang sa listahan. Dinhi sa nasud niabot na og 2,600 kapin ka tawo ang natakboyan sa maong makamatay’ng sakit, ug dinhi sa siyudad sa Sugbo, niabot na og 23 ang mga napositibo.

Kon hunongon na ang quarantine, mosiaw gyud pag-ayo ang coronavirus kay sayon ra man kaayong makatakod diha sa mga tawo nga maghuot sa mga diskohan, mall, tunghaan, sinehan ug sa ubang mga “crowded” nga mga lugar.

Mao nga agwanta lang usa ta nga magpuyo sa atong balay, apan hinoon nasayod ko nga lisud kaayo ni ngadto sa mga tawo nga “no work, no pay.” Apan maayo gani kay ang kagamhanan mohatag man og mga hinabang sa mga pobre gyud kaayo.