EDITORYAL - Kompetensiya ang pagtabang?

Wala ug tuo ang mga nadungog nga mga reklamo sa katawhan kabahin sa kaguliyang sa pagpanghatag sa mga hinabang sa gobiyerno, gikan palang sa barangay level hangtud na sa nasudnong kagamhanan.

Ang krisis nga mugna aning coronavirus (COVID19) nakahatag og kahasol sa katawhan ug sa gobiyerno, lokal ug nasyonal mao nga ang tanan gikinahanglang magtinabangay.

Apan dunay migawas nga report sa Philstar.Com kagahapong adlawa nga nag-ingon, nga giawhag sa usa sa mga commissioners sa Presidential Anti-Corruption Commission (PACC) nga si Manuelito Luna paimbestigahan si Bise Presidente Leni Robredo sa National Bureau of Investigation tungod matud pa “for illegal solicitations, actions that compete with, or calculated to undermine” sa gihimo karon sa gobiyerno pagpakgang sa COVID-19.

Giingong daw nakigkompetinsya ang kampo ni Robredo sa gobiyerno. Apan kun buot tan-awon murag nasagolan kini og pamolitika. Ang kampo ni Robredo miingon nga bisan kinsang tawo nga moingong gikompetensiyahan ang gobiyerno sa mga nitabang, naghatag og donasyon niining panahona, maoy wala makasabot  sa kadako sa krisis nga giatubang sa nasud karon.

Sa ato pa kung mao ni, ang mga donasyon sa nagkalain-laing mga non-government organization, mga kompanya, mga indibidwal, pakig-kompetinsiya na diay sa paningkamot sa gobiyerno nga makatabang?

Kun tinuod imbestigahon si Robredo tungod sa pagdonar niya og mga medical equipment, personal protective equipment sa mga tambalanan, pagdalit og transportasyon para sa mga frontliners padung sa tambalanan pabalik sa ilang mga pinuy-anan, pagpangita og kapuy-an sa mga frontliners duol sa ilang gitrabahoang tambalanan ug pagpanghatag og mga relief goods sa mga kabus, paghatag og pagkaon sa mga nagbantay sa checkpoints, kompetisyon diay sa paningkamot sa gobiyerno, wala nay moboluntaryo og tabang.

Nabuhat kini ni Robredo nga wala mangayo og dugang budget gikan sa gobiyerno kondili pinaagi sa panawagan ug daghan ang nitubag. Hinuon giklaro sa laing opisyal sa PACC pinaagi ni Commissioner Greco Belgica kagahapon sa hapon nga ang pamahayag ni Luna iya rang personal nga opinyon ug dili sa ilang ahensya.