Orbi et Urbi sa COVID-19

Pila na ka semana ang kagabhion. Baga nga kangitngit nihabol sa kinatibuk-an; nibalikos sa atong kinabuhi, makabungog ang kahilom ug makalilisang ang kahaw-ang; ato ning mabatyagan sa hangin, sa lihok sa katawhan, sa mabalak-on nilang pasiplat. Nahadlok ta ug nasaag.

Wa tang kapangandam ning bangis nga unos. Nahimutang ta sa samang sakayan, pulos huyang ug nagduhiraw, apan mahinungdanon ug gikinahanglan, kitang tanan kinahanglang mamugsay.

Di makapadayon nga maghunahuna lang sa kaugalingon, maluwas lang kon magtinabangay.

Ginoo, nagpatuyang mi sa tumang kapaspas, nagdahom nga mga gamhanan ug makahimo bisan unsa. Hakog sa ginansiya, gitugotan ang among kaugalingon nga maulipon sa katigayonan.

Wa mi mohunong bisan sa imong mga pahimatngon, wa mi mapugwat sa mga gubat o inhustisya sa kalibotan, wa mi maminaw sa tiyabaw sa mga kabos o sa masakiton namong planeta.

Nag-agad ang atong mga kinabuhi sa kasarangang katawhan—ang kasagarang malimtan nga katawhan—nga di makita sa kadaghanan, apan maoy magbuot sa mga panghitabo sa atong panahon: mga doktor, nurses, kawani sa mga tindahan, tiglimpiyo, tig-atiman sa masakiton, drayber sa mga sakyanan, kapolisan ug kasundalohan, boluntaryo, kaparian, relihiyusong kalalakin-an ug kababayen-an ug daghan pang uban nga nakasabot nga way ibayaw sa kaluwasan sa ila lang kaugalingon.

Duna tay dugokan: sa iyang krus kita naluwas. Duna tay timon: sa iyang krus nahaw-as ta sa kasal-anan. Duna tay paglaom: sa iyang krus naayo ta ug gigakos aron way makabuwag nato sa iyang gugma.

Hinigugma kong mga igsuon, gikan ning dapit nga nagmatuod sa kalig-on sa pagtuo ni Pedro, itugyan ko kamong tanan sa Ginoo, pinaagi sa panabang ni Maria, Kahimsog sa Katawhan ug Bituon sa mabagyuhong Kadagatan.

Gikan ning tigbayon nga nigakos sa Roma ug tibuok kalibotan, hinaot nga ang bendisyon sa Ginoo mokunsad ninyo isip makapahupayng gakos.

Ginoo, hinaut nga imong bendisyonan ang kalibotan, hatagan og kahimsog ang among panglawas ug kagaan ang among mga kasingkasing. Giawhag mi nimo nga di mahadlok.

Apa ang among pagtuo huyang. Hinunoa, ikaw, Ginuo, di mobiya namo sa bangis nga unos. Ingna mi pag-usab: “Ayaw kahadlok.” Ug kami, uban ni Pedro, motahan sa tanan namong kahingawa nganha nimo, kay ikaw naghunahuna namo.”

[Mapanghasong hubad sa wali ug pangaliya ni Pope Francis sa St. Peter’s Square taliwa sa kalibotanong hulga sa Covid-19].