EDITORYAL - Positibo gikan sa COVID-19

Nahipos ug gyud ang katawhan diha sa ilang mga panimalay bisan tuod aduna gihapoy pipila ka lugas nga padayon gihapong nagsige og yampungad sa karsada sa walay igong hinungdan.

Sa pagpatuman sa enhanced community quarantine, makapalibog man ug makahasol sa mga tawo ilabi na kay managlahi og oras ug adlaw kini gipatuman sa kaso sa Cebu City ug sa tibuok probinsya sa Sugbo, ang importante nimenus gyud ang tsansa sa coronavirus (COVID19) nga makatakod sa uban.

Iampo nalang nato sa Kahitas-an nga pinaagi niining gipatumang mas hugot pang protokol pagpakgang sa maong sakit magbunga og maayo para sa Sugbo ilabi na sa gidaghanon sa mga natakboyan.

Sa sinugdanan, kadto lang mga persons under investigation (PUIs) ug mga persons under monitoring (PUMs) ang napugos pagpundo sa ilang balay apil na ilang mga pamilya.      

Dili sab nato maingon nga pulos nalang bati ang dala niining COVID-10, kay pagkatinuod kun dili pa niini dili gyud mapundok sa panimalay ang mga pamilya.

Karon, bisan pinugos pag-quarantine ang mga tawo nakatabang kini pagpalig-on sa relasyon sa matag miyembro sa pamilya.

Ang kaniadto halos dili magkita tungod sa mga trabaho ug gikalingawan sa gawas, subling nagkitaay ug nakahatag nila og higayon  bisan pipila lang ka minutos nga magkaestoryahanay.

Dunay uban nga kaniadto nagkabingkil ug wa na magtinagdanay nagkauliay sa maayong kabubut-on.

Mahimo sab kining gamiton sa mga ginikanan aron maymayan dulot sa kasingkasing ang ilang mga anak kabahin sa mga panghitabo karon ug ang koneksyon niini sa kaugmaon sa ilang mga anak.

Labaw sa tanan, may higayon na sab silang magdungan sa pagkaon ug mag-ampo ug makapasalamat sa Kahitas-an kay basin mao kini ang kuwang ug gipangita sa mga anak o gipangita sa mga ginikanan gikan sa ilang mga anak.

Mas maayong mangita og bisan gamay nga kaayohan gikan sa mga pagsuway aron dunay magamit sa pagbangon sa unahan.