Gibalibaran sa hospital ang pasyente
Dear Atty. Divine
Ang among silingan gidala sa private hospital tungod sa grabeng sakit sa tiyan. Mi advice ang doctor nga ipa admit kini ug gipangayuan sila og down payment sa tambalanan.
Apan napakyas sila sa pagbayad hinungdan nga sila gibalibaran ug gitambagan sa pagbalhin nalang ngadto sa public hospital ug wa silay nahimo napugos gyud sila sa pagbalhin. Ang akong pangutana kun di ba diay mapugos ang mga private hospital sa pagdawat sa pasyente ilabi na kun emergency case? Daghang salamat.
Nelia
* * *
Dear Nelia,
Basi sa Republic Act No. 10932 kini hingpit nga nagdili sa mga hospital sa pagpangayo og deposit sa pasyente sa dili pa kini nila tambalan o i admit. Ang mga hospital gidid-an usab sa pagbalibad sa pasyente nga nagkinahanglan og dinalian nga attention or emergency medical procedure.
Busa kun gibalibaran ang pasyente tungod sa kapakyas pagbayad sa down payment, mamahimong ireklamo ang maong tambalan tungod kay usa kini ka kalapasan sa balaod ang ilang gibuhat. Mas maayo nga modangop sila sa Department of Health aron sila mahatagan og assistance kun sila interesado nga mopasaka og reklamo sa private hospital. Thanks and God bless
Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest
