Paita namong pobre uy

Bisan og may kuwarta ka pa, pwerteng gihapong lisura sa pagpangompra ug mga pagkaon diha sa mga grocery stores karong panahona.

Hangtud karon, wala ko milakaw kay nahadlok sa gitug-an sa among silingan nga kaniadtong Huwebes kuno, kadlawon pa siya nga miadto sa grocery diha sa Colon apan pwerteng daghana na sa mga tawo nga naglinya.

Resulta, ala una sa udto na siya nakahuman sa pagpangompra. Dili lang gyud unta mag-panic buying kay daghan pa man og mga pagkaon nga mapalit.

Tan-aw nako, ang labing problema sa katawhan karong panahona, ilabina niadtong sama nako nga pobre, mao ang kuwarta. Daghan sa katawhan karon nga wa na’y mga trabaho.

Ang ubang trabahante, sama sa mga tindera sa usa dakong mall dinhi sa Dakbayan sa Sugbo, giingong gipanghatagan og tag P5,000 kada usa sa ilang management.

Apan dali ra kaayong mahurot ang maong kuwarta ug kay wa pa man mahibaw-i kon kanus-a sila makabalik og trabaho, nagpasabot nga dako kaayong problema sa ilang panggasto.

Kini maoy gitan-aw nako nga problema sa kinabag-ang katawhan.

* * *

Dinhi sa Dakbayan sa Sugbo, dunay mga bugas nga gipalit ang siyudad aron ipanghatag sa mga pobre, apan ang pangutana kon mahatagan ba ang tanan?

Unta, kadtong mga gitahasan ni Mayor Edgar Labella sa pagpanghatag og bugas, mohiklin unta sa pagpamolitika ug dili nila pilion kon kinsa ang hatagan.

Pait kaayo hunahunaon kon ang panghatagan nila kadto ra’ng ilang mga supporters sa miaging eleksyon. Diri lang sa among sitio, daghan kaayo ang angay’ng tabangan.

Ang pangutana kon kining mga tawhana mahatagan ba kaha og tabang pinaagi sa tag 25 kilos nga bugas humay nga ipanghatag gikan sa Cebu City Hall ug gipaagi sa barangay?

Kada barangay gigahinan og tag 1,000 ka sakong bugas humay. Sa ato pa, 2,000 ka kabus nga pamilya ang mahatagan.

* * *

Sugod karong udto, did-an na ang mga public ug private vehicles sa pagbiyahe. Ang mga private vehicles mahimong katugotan kon ang nag-drive niini adunay passes nga gikan sa mayor.

Malantawan nako nga pwerte na gyud tingali nga mingawa sa atong mga karsada ug bisan na sa mga sityo kay gidid-an na man ang katawhan nga magsuroy-suroy gawas sa ilang balay.

Pero pasabton ko kamo nga kining “lockdown” nga gipatuman sa atong mga opisyal, gitumong kini aron nga dali ra nga masulbad kining problema nato bahin sa Coronavirus Disease.

Kon dili na makatakod ngadto sa tawo ang Covid-2019, anam-anam ra kini nga mangahanaw. Awhagon nako ang katawhan nga motuman ta sa kamandoan sa atong mga opisyal.