EDITORYAL - Nihit o nagpaburot og presyo?

Samtang gipatuman kining community quarantine sa Sugbo, nakatutok ang tanan sa gidaghanon sa mga natakboyan sa COVID-19 ug sa mga nangamatay, ug sa mga pamaaging gihimo sa gobiyerno aron mamenusan ang gipaspason sa pagtakboy niini.

Apan luyo niining maong sitwasyon, tutokan sab unta sa ubang hintungdang mga ahensya sa gobiyerno ang lain pang problema sa mga apektadong mga lumolupyo.

Dili lang ang virus ang gikabalak-an ug gihunahuna kada adlaw sa publiko samtang sila gipaubos sa community quarantine. Nag-atubang sab sila og problema pag-abot sa ilang pagkaon ug nag-unang panginahanglan.

Dunay mga migawas nga report nga nisaka ang presyo sa bugas ug uban pang nag-unang palaliton diha sa kamerkadohan.   Ang rason sa mga namaligya, nihit ang nanulod nga supply tungod sa gipatumang quarantine ug kahigpit sa mga checkpoints maong ang uban dili makasulod. Ang maong rason dili katuohan ug dili angay balewalaon sa mga naa sa taas. Tungod kay una sa tanan, si Pres. Duterte sa sinugdanan pa lamang  daan ng mipasalig nga bisan magkinaunsa dili maapektahan ang pagbiyahe sa mga pagkaon sa katawhan.

Ang gipasabot sa presidente, samtang tuod dunay paghigpit sa mga kalihokan sa katawhan dili maputol ang supply sa batakang panginahanglan.

Kun tinuod kining pasangil sa mga nagbaligya og bugas, maayong tingali nga molihok ang kapolisan pagbadlong o pagkorehir sa naghinobra kahigpit sa ilang mga checkpoints.

Apan kun namakak ug namintaha lang kining mga manindahay, mas maayo tingaling kada adlaw gyud molibot ang taga Department of Trade and Industry sa kamerkadohan. Kun mahimo gani, magbutang gyud sila og mga magbalantay tibuok adlaw diha sa kamerkadohan aron ma-monitor ang presyo sa mga palaliton ug sampolan dayon og kiha kadtong masakpang namintaha sa sitwasyon ug dili lang magpaabot kun dunay moreklamo.

Maayo ang mga adunahan kay duna kanunay ikapalit og ubay-ubay nga supply apan ang makaluluoy kadtong mga kabus nga mag-agad sa kitaon kada adlaw.

Kun matungnan nga gipaburot ang presyo, pila nalang may ilang mapalit?