Balaud military

Una gipaubos ni Presidente Rodrigo Roa Duterte ang Metro Manila sa General Community Quarantine ug dayon ang kinatibok-ang Luzon ubos sa enhanced General Community Quarantine.

Ang tumong ug tuyo niini mao ang pagpugong sa mga tawo sa dili na paglaaglaag ug sa pagpuyo na lamang sa ilang panimalay aron mapugngan ang pagkatap sa makamatay nga Coronavirus Disease o COVID-19.  Ang mando sa presidente gikopya sa daghang mga lokal nga kagamhanan sa tibuok nasud, ilabina niadtong aduna nay nagpositibo sa COVID-19.

Apan kining maong kamandoan dili gayod epektibo tungod sa kadaghang tawo sa nasud nga mga badlungon. Busa akong isugyot sa presidente ang pagpakanaug og proklamasyon nga magbutang sa tibuok nasud ubos sa balaud militar.

Nalatid sa Article VII, Section 18 sa 1987 nga Constitution o Batakang Balaud sa Pilipinas ang military nga gahom sa Presidente. Tulo ka klase ang military nga gahom sa presidente. Una, ang pagtawag sa mga sundalo sa nasud aron sumpoon ang kagubot ug kaguliyang (lawless violence), pagpanulong (invasion) ug pagrebelde (rebellion).

Ikaduha, ang pagsuspenso sa pribilihiyo sa Writ of Habeas Corpus ug ang ikatulo mao ang pagbotang sa usa ka dapit o tibuok nasud ubos sa balaud militar kun gikinahanglan sa sitwasyon.

Ang Pilipinas giataki sa kontra nga dili makit-an nga mao ang coronavirus. Daghan na ang naigo ug daghan na usab ang namatay. Matag adlaw nagkataas ang gidaghanon sa mga naigo ug labing seguro modaghan usab ang mamatay.

Mosamot pa gayod ang gidaghanon sa maigo sa virus tungod sa kagahi sa ulo sa mga tawo nga bisan unsaon sa pagsulti ug pagpasabot sa gobyerno nga tago sa balay aron dili maigo, pero dili gayod motago, hinuon nagpabantang sa bala sa virus.

Tungod ning maong sitwasyon, gikinahanglan na nga ipaubos ni Duterte ang tibuok Pilipinas sa balaud militar.