Lockdown, dili sayon

Sa kagahi og ulo sa mga tawo nga dili motuman sa COVID-19 protocol sama sa social distancing makapangandoy ang uban nga maayo unta kun estriktohon pa gyud sa gobiyerno ang lakang pinaagi sa pagpatuman sa total lockdown sama sa gihimo didto sa Luzon.

Gani kada ukab nato sa facebook modayon og ingon ang mga netizens nganong wala man ang lockdown aron mapugngan gyud ang pagkatap sa virus.

Sayon kaayo estoryahon apan wala hunahunaa sa uban ang epekto niini sa mga tawo pareha sa kaulohan.

Maayo man kini nga pamaagi unta kay seniguro nga makontrol ang kalihokan sa mga tawo apan ang pangutana, andam ba kita kong ingon na niini nga patakaran ang ipatuman?

Hunahunaa lang ang usa ka pamilyadong tawo nga dili na makapanginabuhi tungod kay gipugngan na kini, unsay mahitabo sa iyang pamilya.

Kadtong mga kabus nga mangita pa og pagkaon alang sa ilang sunod nga kan-anan nianang adlawa asa man manguha og ikapakaon sa iyang mga anak?

Maayo kadtong mga kwartahan kay nakapundo na human mag panic buying apan kadtong wala gyud intawon dili sila makatay sa virus apan mamatay sa gutom.

Ang kagamhanan mismo wala kaandam sa gihimo niining lockdown sa Luzon kay walay mga batakang panginahanglanon a g nahatag nila, kon duna man dili ra gyud kalahutay sa panginahanglan sa tawo aron makasugakod.

Ang sitwasyon didto sa kaulohan ang hinungdan nganong wala gyud matintal ang mga lokal nga opisyal sa pag lockdown kay wala gyud maandam ang ipanghatag sa mga tawo aron makasugakod sa kinabuhi.

Karon mangandoy pa mo nga mag lockdown?  Aron dili kini mahitabo gikinahanglan nato nga motoo sa atong gobiyerno dili magsupak supak ug mag pinilosopo.

Kung magkahiusa kitang tanan dili na mahitabo nga mag lockdown tungod kay mabuntog naman ang atong kaaway nga coronavirus disease o COVID-19.

Daghan na gani ang galisod karon samotan pa kun i-lockdown.