Insentibo alang sa mga frontliers

Makapanimbawot sa balahibo ang realidad nga daghan karon sa mga medical personnel dinhi sa Pilipinas ang walay suwerte nga nataptan sa Coronavirus Disease o COVID-19 sa ilang pagpakigkumbati batok niini.

Sa niaging semana, adunay taho nga mokabat sa subra sa 150 ka medical personnel didto sa kaulohan ang nataptan kuno sa maong sakit sa ilang pag-atiman sa mga pasyente. Gani aduna kunoy pipila kanila ang walay swerte ug namatay gayud.

Niining dakong risgo nga giatubang sa atong mga medical personnel taliwala sa paghasi sa COVID-19, angay lamang nga adunay dinaliang aksiyon ang kagamhanan paghatag kanila og dugang insentibo gumikan sa bayanihong nilang trabaho batok sa maong balatian.

Bilib ko sa lakang didto sa Singapore tungod sa dakong tabang nga gitunol sa gobiyerno niini ngadto sa ilang mga medical personnel taliwala sa kumbati batok sa coronavirus sa ilang nasud, nga usa sa unang nataptan sa Southeast Asia.

Sa niaging mga bulan, miamunsiyo ang primerong ministro sa Singapore nga kaltasan og dako ang iyang suweldo ug sa ubang government officials aron makalikom og pondo paghatag og financial assistance ngadto sa mga medical workers sa maong city state.

Dalaygon kadtong mao nga lakang ug nagpasabot lamang sa dakong pagtagad nga gihatag sa gobiyerno didto sa ilang mga trabahante sa hospital ug ubang medical facilities sa paningkamot nga ma-contain ang pagkuyanap sa maong virus.

Karon, ang Singapore maoy nag-unang ehemplo sa mga nasud diin adunay maayong sistema sa kampanya batok sa Coronavirus Disease. Bisan pa sa gatusan ka kaso sa COVID-19, duha lamang ang natala nga namatay sa maong sakit didto.

Sulondon ang gibuhat sa kagamhanan sa Singapore pagtahag og dakong pagtagad sa mga medical workers niini. Hinaut nga nakakat-on og maayong leksiyon ang gobiyerno sa Pilipinas niini taliwala sa seryosong risgo nga giatubang sa atong mga doktor, nurse ug uban pa. Hinuon mimando na si Presidente Rodrigo Duterte nga hatagan og P500 hazard pay matag adlaw kadtong mga government workers nga motrabaho atol sa quarantine period. Kini naglangkob sa mga kapolisan ug public health ug social workers.

Dako kini nga tabang ngadto sa atong mga frontliners. Kini tungod kay makapataas kini sa ilang moral taliwala sa ilang dakong kumbati batok sa maong balatian.