Bravo Mayor Labella!

Nakabasa tingali si Cebu City Mayor Edgardo Labella sa akong lindog dinhi sa Banat News nga luoy kaayo ang mga buta karon nga wa na’y pangita tungod kay nimenos man ang magpamasahe kanila.

Sayo kagahapon sa buntag, mipadala og text message ang mayor kanako ug giingnan ko nga paadtuon sa iyang opisina aron nga makahatag siya’g tabang sa mga buta nga akong mga silingan diri sa Barangay Apas.

Gipasabot ni Mayor Labella nga patabangan gyud niya sa City Hall kadtong mga lumolupyo dinhi sa Dakbayan sa Sugbo nga apektado sa pagtumaw niining novel coronavirus (COVID19).

Apan ang ubang mga pobre gyud kaayo nga nanginahanglan og tabang, adto na sa mga tinugyanan sa kabarangayan ipaagi ang ilang mga hinabang ug magsugod ang pagpanghatag ugma.

Salamat kaayo Mayor Labella sa imong pagkamatinabangon. Unta, kon manghatag na og bugas ngadto sa mga pobre gyud kaayo nga ipaagi sa mga tinugyanan sa mayor diha sa kabarangayan, ihiklin unta ang pamolitika.

* * *

Dunay usa ka iladong magpapatigayon dinhi sa Dakbayan sa Sugbo nga miangkon gyud ngadto sa amigo nako nga sakop sa media, nga siya apil sa napositibo sa Corona Virus Disease.

Apan nahibulong mi kay wa man kini maapil sa listahan ni Cebu City Health Officer Daisy Villa. Ang iyang gibutyag nga “suspected Covid-19 positive” mao ang upat ka tawo nga ang resulta sa Vicente Sotto Memorial Medical Center, ila pa nga gipa-confirm didto sa Research Institute of Tropical Medicine.

Kun pananglit ma-confirm ang upat nga positibo gyud sila sa Covid-19, magpasabot na kini nga maantigo na ang mga medical personnel diha sa VSMMC nga moila sa maong sakit, ug sa sunod dili na kinahanglang mopadala pa sila og sample ngadto sa RITM alang sa confirmation.

Gipasabot ni Dr. Villa nga dili nila mahimong madeklarar nga Covid-19 positive kadtong mga pasyente nga wala magpahiling sa VSMMC nga mao ra ang gi-accredit sa RITM sa paghimo og laboratory analysis sa mga suspected Covid-19 patients.

* * *

Didto sa City Hall kagahapon, maayo gani kay nakadala ko og mask kay dili unta ko makasulod. Sa ganghaan pa lang sa City Hall, harangon na ang mga mosulod sa mga guwardiya ug sutaon kun wa ba sila hilanti.

Gamitan sila og thermal scanner aron pagsuta sa ilang temperatura, ug dayon kinahanglang magsul-ob sila og mask. Apan nabantayan nako nga ang uban nga tua na sa sulod, tangtangon nila ang ilang mask.

Akong awhagon ang mga guwardiya nga estrikto gyud nga ipatuman nga pagawason ang mga dili magsul-ob og mask, aron pagpatuman og disiplina. Mag-mask man gani ang mayor, kamo pa?