Bora-bora

Magpalain ta sa atong hisgutan karon. I-adto lang nato sa uban ang mga hilisgutan bahin sa coronavirus. After all, tibuok adlaw ug gabii, ang tanang media outlets nag-concentrate sa hisgutanan bahin niining matang sa sakit nga mitakboy na sa tibuok kalibutan.

Of course, kinahanglanon kaayo kini aron ma-updated kita sa mga kasayoran bahin niining maong sakit, aron masayud kita unsay angay buhaton.

Nindot kining gihimo sa Konseho sa Dakbayan sa Mandaue, hinaut nga himuon o gihimo na sa ubang mga dakbayan ning atong lalawigan.

Gi-aprobahan sa first reading sa Konseho sa Mandaue City ang “Anti-Bora-Bora Ordinance of 2020,” nga magsilot ni bisan kinsa nga mag-drive sa “ motor vehicle with open pipe or those without a muffler, defective or modified muffler, sound booster.” Sa laktud, saba’ kaayo nga mga tambutso.

Ambot ngano sad ning ubang mga motorista nga sa ilang kahambugero, ila mang i-modify ang ilang mga muffler aron mo-saba’ pag-ayo ang ilang motor?

Unang mabiktima niini mao kitang mga senior citizen nga most  of the time, ania ra sa mga panimalay nagpahulay. Pananglitan, sa udto, nga nindot kaayong ipahulay ug ikatulog, pukawon kita sa kasaba’ sa habal-habal. Pastilan!

Unya, sa tungang gabii ug sa sayong kabuntagon, ang uban nato naghagok pa, mahipugwat  gumikan sa kasaba’ sa mga motorsiklo.

Ang akong nahibudngan nga mao ra man og helpless ang atong gobyerno niini. Aduna man tingali kitay mga anti-noise ordinances sa atong mga dakbayan.

So, sa ako nang giingon, nindot ning gihimo sa  Konseho sa dakbayan sa Mandaue, ug hinaut nga dili kay kutob lang sila sa ordinansa kundili, maimplementar gayud kini to the letter.  Ag mga violator multahan og P1,000 (gamay ra ni da!), ug ang ilang mga open pipe, modified muffler ug sound booster imbarguhon.

Kon magdumili ang motorista pagtangtang sa saba’ nilang tambutso, ang sponsor niining maong proposed ordinance, si Konsehal Jimmy Lumapas nagkanayon: “Should the owner refuse for the removal of the open pipe, modified muffler or sound booster from his motor vehicle during apprehension, the TEAM shall tow and impound such motor vehicle. In such case, the towing fee and storage fee, if applicable, shall apply.”   Alang kang Konsehal Lumapas, mahinungddnon kaayo ang panglawas sa tawo. Nga kinahanglan kapanalipdan sila gikan sa “prolonged exposure to noise pollution.” Bitaw, gawas nga makaputol o maka-shorten kini sa atong pagpahulay ug pagkatulog, makabungol sad kon magkanunay ug magkadugay ang exposure.

Ug kinahanglan hatagan og lig-on nga ngipon kining maong ordinansa once ma-approve sa final reading, ug tinud-on na gayud sa mga implementing agencies ang pagpatuman niini, sama sa Traffic Enforcement Agency of Mandaue (TEAM) ug ang Mandaue City Police Office –Traffic Management Unit. 

Dugang niini, ang proposed measure nagkanayon nga: “No motor vehicles shall be allowed to be driven or operated without having been properly equipped, at all times, with either a muffler or any noise dissipative device in constant operation and of sufficient capacity to its motor engine to prevent the escape of excessive and disturbing noise.”

Hinaut nga maluoy na kanato ang mga motorcyclist, ug papahuwayon na kita gikan sa gi-modify  ug saba’ nilang mga muffler.