COVID-19 masumpo ra

Kon motuman lang gyud unta ang katawhan nga sila mag-self-quarantine sa tagsatagsa nila ka panimalay, unya likayan nila ang pagtambong og mga tigum, sigurado nga masumpo ra nato ang coronavirus disease.

Ngano man? Tungod kay base sa akong nabasahan, ang coronavirus mamatay ra paglabay sa 14 ka adlaw. Sa ato pa, kon ang kagaw dili makatakod og laing tawo sulod sa duha ka semana, mamatay ra kini.

Mao kini ang rason ngano nga gimando sa kagamhanan nga himoon gyud nato ang pag-self-quarantine.

Sa ubang mga dapit, gi-lock down na gani sila ug wala na tugoti nga makabiya sa ilang lugar.

Ang mga barko ug eroplano gidid-an na sa pagbiyahe hangtud sa Abril 14 aron nga mahunong na ang pagbiyahe sa mga tawo ngadto sa lain nga mga lugar.

Nindot baya kini nga paagi, apan daghan ang wala kaayo makasabot niini. Abi ninyo, sukad nga misiaw kining maong virus, wa na gyud ko kaayo magsuroy-suroy kay basin og makasugat ta’g tawo nga natakboyan na og Covid-19.

Magtinabangay ta ug atong paningkamotan nga ang Corona virus dili na gyud makatakod og laing mga tawo aron nga paglabay sa 14 ka adlaw, mangamatay ra ang maong kagaw.

Antos lang gyud ta. Ang pagsaulog sa inyong mga birthdays, ang pagpahigayon sa inyong mga kasal ug ubang pundok-pundok, mahimo ra kini nga himoon nato kon wala na ang coronavirus.

Nasubo gani ko kay ang kadagkoan sa simbahan, mikanselar sa mga misa alang sa publiko, apan nakasabot ko nga ang hukom ni Arsobispo Jose Palma nasubay ra sa paninguha sa kagamhanan pagsumpo sa Covid-19.

Sigurado gyud hinoon ko nga daghan ang magping-it sa kalisud niining panahona, gawas lang niadtong daghan og mga tinigum nga ikagasto atol niining panahon sa kalisdanan.

* * *

Dunay mga tawo nga mihimo-himo og “fake news” nga pito a ka tawo nga namatay sa Covid-19 dinhi sa Sugbo ug nga kuno gitago lang sa atong mga tinugyanan sa kagamhanan.

Hala, maayong tinud-on gyud ni sila pinaagi sa pagpasaka og kaso sa hukmanan kay nakahatag sila og kahadlok sa katawhan. Misurender ang maong naghimo og post sa social media ngadto kang Mayor Edgar Labella.

* * *

Lain pa’y ato, gipaundang man diay ang lotto ug ang mga duwa sa Philippine Charity Sweepstakes Office, unya nganong ang duna may mga outlets diha sa Carcar ug ubang dapit dinhi sa Sugbo nga padayon pa nga namaligya og tickets?

Klaro na kaayo ni nga tikas ug ang resulta hinimo-himo ra. Ayaw mo patental nianang mga binuang sa ubang nagpadagan og mga outlets nga nagpatuo nga legal apan diay, ilegal.