Pagkatoytoy gyud

Walay lalis nga mga utokan ang atong kadagkoan sa Department of Health ug sa ubang ahensya sa kagamhanan.

Dili madawat sa tagsa-tagsa nila ka  katungdanan ang maong mga opisyal kondili pa sila mga utokan.

Apan nahibulong ko kay matud sa DOH, gusto sila nga motabang sab ang katawhan pagsumpo sa pagkuyanap sa Corona Virus Disease.

Kun naka-experience kuno ta nga nakaduol ta sa mga tawo nga nakasinati na og Covid-19, kinahanglang moduol dayon kita sa mga doktor, ilabi na kon nakasinai na kita og mga timailhan sa maong virus.

Mura’g kataw-anan ang kadagkoan sa DOH nga kuno gusto sila nga motabang ta nila. Abi ninyo og ngano? Gusto man kaha ang mga opisyal sa DOH nga motabang ta nila apan unsaon nato pagkasayod kun kinsa ang mga napositibo sa Covid nga gitago man nila ang identity?

Para kanako, kun public health na gani ang issue, dili na mahimo nga ipalabi ninyo ang pagtago-tago sa pagkatawo sa mga hingtungdang pasyente.

Kini aron nga molikay ang mga tawo nga mentras naa pa kaniya ang virus, molikay lang sa ta. Kun dili nila itug-an, unsaon nato pagkasayod ug mohimo ta og nga precautionary measures?

Tiaw mo, bisan og naospital na ang maong mga tawo nga natakboyan og Covid 19, dili man gihapon kita makaila kay igo ra man sila nga moingon nga ang napositibo mao ang “patient no. 31” o “patient no. 5.”

Usbon nako, kun gusto man gani ang DOH nga dili kaayo mokuyanap ang Covid 19 virus, ipahibawo nila kon kinsa ang mga nataptan. Tinuod nga dunay balaod nga ang nga pasyente sa mga ospital ug sa mga klinika, dili basta-basta nga ibutyag ang ilang nga rekords.

Apan pastilan, public welfare na ang naglambigit niini. Kon padayon nila nga dili ibutyag kon adunay mapositibo sa Covid-19, tabla ra nga kataw-anan sila nga nag-awhag sa katawhan ug tabang pero sila wala moabag. Pagkatoytoy gyud.

* * *                

Bisan og daghan na nga mga barangay nga miabag sa PROBE team  sa pagpanghawan sa ilang mga karsada ug aseras, daghan pa gihapon ang mga opisyal nga nanghinan-aw lang.

Kini nga mga opisyal maayong pahamtangan og silot ug tangtangon sa ilang mga katungdanan.

Walay pulos kining maong mga opisyal nga nagkangkang lang ang mga kamot nga modawat sa ilang honorarium apan way mga klarong trabaho.