Panalipod sa COVID-19
Sigun sa Worldometer Survey, niabot na og 119,220 ang mga kaso sa Coronavirus Disease-19 o COVID-19 diin moabot napud ngadto sa 4, 299 ang mga namatay.
Ning maong gidaghanon sa mga namatay nag-una niini ang lima ka mga nasud nga mao ang China nga dunay 3, 158, gisundan kini sa Italy nga dunay 631, anaa sa ikatulong dapit ang Iran nga adunay 291 ka mga namatay, ikaupat ang South Korea nga may 61, ug ikalima ang France nga may 33 ka mga namatay. Salamat sa Ginoo nga ang Pilipinas nagpabilin sa gihapon nga aduna lamay usa nga namatay.
Sa 119,220 ka mga kaso sa COVID 19, 66,564 niini ang mga naka-recover na o nakagawas na sa tambalanan, 48,357 usab ang aktibo pa o infected nga mga pasyente, 42,610 usab ang anaa sa malumo nga kondisyon, 5,747 ang anaa sa seryoso o kritikal nga kondisyon samtang 70,863 ka mga kaso ang gisirado na.
Ang Worldometer gipadagan sa usa ka internasyonal nga grupo sa mga developer, tigdukiduki, ug mga boluntaryo nga adunay katuyoan sa paghimo nga mga istatistika sa kalibutan.
Ang gidaghanon sa mga kaso sa COVID-19 sa kalibutan makapabalaka na nato. Gani ang atong mga opisyal sa nasud nihimo na og mga lakang aron mapanalipdan ang katawhan gikan sa maong balatian.
Usa sa mga lakang nga gihimo sa atong gobyerno mao ang pag-awhag sa katawhan nga mag palig-on sa iyang immune system ug sa pagmentenar sa tukmang kahinlo, sama sa pagpanghunaw sa kamot gamit ang sabon ug tubig o alcohol.
Gawas niini, giawhag usab ang katawhan sa dili kanunayng paghikap sa mata, ilong ug baba aron dili mokatap ang virus.
Nunot niini, ako usab nga giawhag ang katawhan sa pagsunod ning simpleng awhag aron makatabang ta sapag pugong sa COVID-19.
- Latest
