Way kahadlok mangguba

Nindot gyud kaayo og epekto ang kamandoan ni Presidente Duterte nga hawanan ang mga karsada ug aseras.

Dinhi sa Dakbayan sa Sugbo, daghan na nga mga illegal structures sama sa mga tindahan ug kabahin sa balay nga gibungkag sa PROBE team kay anaa man kini gitukod sa aseras.

Dalaygon kaayo ang gihimo sa PROBE nga gipangulohan ni Raquel Arce kay  gibungkag gyud nila ang mga sementadong tindahan nga gitukod sa karsada nga kabahin sa Kawit Street sa Ermita.

Unya, gipadad-an nasab ko ni Arce og kopya sa suwat nga gipadala sa ubay-ubay’ng tag-iya og kabalayan sa Lakandula Street ug ubang karsada sa Taboan area nga migamit sab sa aseras alang sa ilang personal interest.

Unta, paspasan pa sa PROBE ang pagpanghawan sa mga karsada ug aseras. Kagahapon mora’g ang PROBE didto sila manghawan sa Lahug.

Kon mahawan na ang mga karsada ug aseras ug makuha na ang mga illegal structures, hapsay na ang atong siyudad ug makatabang kini sa pagsulbad sa problema sa traffic.

Unya, angay gayud nga ang kadagkoan sa Department of the Interior and Local Government (DILG) mohimo gyud og lakang sa mga opisyal sa kabarangayan nga nagpabaya ra sa ilang katungdanan.

Kon tinud-on ni sa DILG, sigurado nga daghang opisyal sa kabarangayan, apil ang nga opisyal sa Barangay Caretta, dinhi sa Dakbayan sa Sugbo, masuspenso sa ilang katungdanan.

Kini tungod kay gipasagdan ra man nila nga gubot ang Alviola Street nga mao unta ang access road sa mga motorista gikan sa MJ Cuenco Avenue paingon sa T. Padilla Extension.

* * *

May mitaho nako nga usa ka polis ang nagpadagan og video karera ug molimoli diha sa Barangay Calamba, Dakbayan sa Sugbo.

Angay kining susihon sa atong kadagkoan sa kapolisan kay makadaot kini sa dungog sa PNP.

Unya, kadtong may nahibaw-an nga dunay video karera/moli-moli nga nag-operate sa inyong lugar, hatagi ko og kasayuran niini.

Ang akong text line alang sa inyong mga report —09430766611 kay ihatag dayon kini nato sa mga polis.