Naghilashilas lang

Gidakop sa kapolisan ang daghan kaayong nanagduwa og volleyball kay kuno nasakpan nila nga nagpustaanay ug kalapasan kuno sa Presidential Decree 1602, ang Illegal Gambling Law.

Buyno, atong pagakpakan ang kapolisan kay mihimo na sila og kampanya sa illegal nga sugal. Apan siyaro na man pud, nganong gidaginot man nila ang pustaanay nga gipaagi sa volleyball, unya gipasagdan ra ang illegal swertres?

Dili kita molalis nga ang pagpustaanay gidili gyud kay maisip na man kini nga sugal bisan og gibasi pa kini sa modaog sa duwa nga volleyball. Apan ang pangutana mao kini, nganong wala man sila manakop sa mga illegal swertres?

Dili kaha kay ang rason mao nga nagdawat ang kapolisan og payola gikan sa mga tigpasiugda sa illegal swertres, video karera, moli-moli ug bisan na sa mga tigbakayan?

Ayaw ko og ingna nga wala masayod ang kapolisan nga kanang mga gagmay’ng ticket booth diha sa mga daplin sa karsada, ang uban anaa pa sa aseras gibutang, gigamit kana nga pantalya ra sa illegal gambling?

Ang mao nga mga ticket booth para kana sa gitawag og Small Town Lottery (STL) nga adunay lahi nga kombinasyon sa numero nga modaog, apan ang mga nagbantay nianang gagmay nga booth ang gibaligya numero sa swertres.

Wala ba masayod ang kapolisan niini? Ang bag-o nato nga regional director sa PNP Central Visayas, ang director sa Cebu City Police Office, kapolisan sa probinsya sa Sugbo ug ubang mga dapit, wala mo masayod niini.

Mao ni ang giingon, “Tell that to the dead marines.” Kon tinuod ang kapolisan nga mokampanya sa illegal nga sugal, hala himoi og hugot nga kampanya ang illegal swetres, video karera, moli-moli ug tigbakay.

Sayonan ka nga bisan diha sa Barangay Luz ang mga tigpasiugda sa tigbakay naghimo gyud og roydahan nga nakuhaan gyud gani og hulagway ug nakapasuko sa mayor.

Alang sa atong kapolisan, pakit-a ninyo ang publiko nga tininuod ang inyong kampanya batok sa ilegal nga sugal aron dili sila moyamiid ug makaingon nga pulos ra paghilas-hilas ang inyong pagpanakop sa mga nagduwa og volleyball kay kuno nasakpan nga nagpustaanay. Unya, dakpa gyud ninyo ang operator nga nagpadagan sa mga illegal nga sugal, dili kay ang mga ordinaryo lang nga nagbantay sa booth sa illegal swertres maoy inyong dakpon.

Bahin sa video karera, may mga report nga akong nadawat nga migimok na usab ang mga video karera ug moli-moli diha sa Barangay Calamba ug sa Barangay Suba. Ayaw ko’g ingna nga ang mga opisyal sa barangay ug kapolisan wala masayod niini?