Sakpan lagi

Dili mahulagway ug puno sa kauwaw ang hitsura ni Major Ildefonso Miranda Jr., hepe sa Argao Police Station, diha nga gidakop siya ug giposasan sa kapolisan nga nadestino sa Regional Police Office-7.

Ang mga sakop sa PNP Integrity Monitoring and Enforcement Group (PNP-IMEG) nga giubanan ug mga sakop sa Regional Intelligence Division, mironda sa opisina ni Miranda kaniadtong Huwebes sa gabii.

Nasakpan gyud nila nga ang 24-anyos nga babayeng piniriso nga gidakop tungod sa paglapas sa balaod kabahin sa drugas, didto gipakatulog ni Miranda sa iyang quarter.

Matud sa reklamo nga nadawat sa PNP-IMEG nga ang dinakpan nga si Jean Claudia Villanueva pagawas-gawason ra sa hepe gikan sa bilanggoan ug adto pakatulgon sa iyang higdaanan uban kaniya.

Ang tanang kapolisan nga nadestino sa Argao Police Station giimbestigar karon kon ngano nga wa gyuy bisan usa kanila nga nakahatag og kasayuran sa dautang binuhatan sa ilang hepe.

Pagka dakong kauwawan ngadto sa organisasyon sa kapolisan sa gihimo ni Miranda. Tinuod, ulitawo siya apan ang iyang gihimo dakong salaod kay dili man mahimo nga pagawas-gawason ang mga piniriso.

Samot pa nga salaod ang iyang gihimo nga didto niya pakatulga uban kaniya sa iyang higdaanan. Ang cellphone ni Miranda nakit-an ang daghang mga hulagway nga nakigtupad siya’g higda ni Villanueva.

May picture pa gani si Villanueva nga nakasul-ob sa T-shirt sa polis nga iyang ni Miranda. Pagka makauuwaw sa iyang gihimo ug daw giyama-yamaan ra niya ang organisasyon sa kapolisan.

Tiaw mo ba gud nga ang uniporme sa kapolisan iyang gipasul-ob sa piniriso? Husto gyud ang gihimo sa mga sakop sa PNP-IMEG nga wala sila magpanuko sa pagposas ni Miranda nga pinabinaklid pa.

Karon, si Miranda pasakaan og tulo ka kaso. Kini mao ang kalapasan sa Article 156 (Direct Bribery) sa Revised Penal Code; Section 3 (a ) sa Republic Act 3019 (Anti-Graft and Corrupt Practices Act).

* * *

Tingali dili ra kay si Miranda ang naghimo og ingon niini. Posible nga duna pa’y ubang mga hepe sa kapolisan nga naghimo niini nga ang ilang mga piniriso nga guwapa, pagawason nila sa prisohan ug adto pakatulgon sa ilang mga higdaanan.

Gidayeg nako ang informer nga mihimo gyud og reklamo. Ang informer mahimong polis nga sakop ni Miranda nga dugay ra nga naglaway ug naibog kang Villanueva, apan naunhan sa ilang hepe.

Saludohan usab nako ang mga sakop sa PNP-IMEG nga miaksyon dayon sa reklamo nga ilang nadawat batok sa mga polis nga badlongon kay pinaagi niini, mobalik ang pagsalig sa katawhan kanila.