Missing road

Kada adlaw, Lunes hangtud sa Biyernes, ang mga sakop sa PROBE sa dakbayan sa Sugbo mopahigayon gayud og clearing operations sa mga karsada ug aseras sa lainlaing kabarangayan sa siyudad.

Gitug-anan ko ni Raquel Arce, ang hepe sa Prevention Restoration Order and Beautification Enhancement, nga makigtambayayong sila sa mga opisyal sa kabarangayan aron nga mas paspas ang ilang pagpanghawan sa mga aseras ug karsada.

Suporta kaayo ko niining paspas nga pagpanghawan sa mga aseras tungod kay angay lang nga ang mga dapit nga para sa publiko, atong ipagamit sa katawhan, ug dili kay ipagamit ra sa pipila ka mapahimuslanon.

Dunay uban nga wala kaayo makasabot ug mihulagway nga wala kuno’y kaluoy ang mga sakop sa PROBE kay gikuhaan og panginabuhian ang mga tawo nga nagnegosyo.

Ambot og ang ilang gipasabot mao ba ang mga tawo nga walay kaikog nga gihasol-hasol nila ang kinahag-ang katawhan kay ang aseras ilang gigamit nga kabahin sa ilang balay u gang uban giimong tindahan. Ang akong pangutana, kinsa man ang makaginansya? Dili ba sila ra man ang mga naninda? Kinsa man ang tag-iya sa luna nga gihimo nila nga kabahin sa ilang balay, ug gihimong tindahan? Dili ba kita man nga tanan?

Gibalikbalik na nako sa makadaghan na nga higayon nga kon dili nato aksyonan kining mao nga pagpangabuso pagka karon, moabot ang adlaw nga gamay na unya kaayo ang atong mga karsada.

* * *

Wala tingali kamo masayod nga diha sa Barangay Suba, Dakbayan sa Sugbo, dunay usa ka karsada nga hingpit na gyud nga nahanaw pagka karon kay gitukoran na kini og kabalayan.       

Ambot og nganong wala man gyud magtagad niini ang atong mga opisyal sa Barangay Suba ug Dakbayan sa Sugbo. Ayaw ko’g ingna nga wala sila masayod kabahin niini.

Base sa sinuwat nako nga balita sa The Freeman niadtong 2007 ug gihimoan nako og follow-up niadtong Oktubre 7, 2014, ang “missing road” mao ang kabahin sa F. Rallos Street nga sakop sa Barangay Suba.

Kining mao nga karsada gihinganlan kini og F. Rallos Street, pahinungod ni Don Florentino Rallos, ang labing una nga napiling municipal president nga ang ranggo katumbas sa mayor, ug miserbisyo siya hangtud sa 1907.

Bisan ang akong higala nga si Suba Barangay Kapitan Jojo Sable mipasar og resolusyon kaniadto nga nag-awhag sa City Hall nga i-revive ang mao nga “missing road.” Ang F. Rallos Street nagdugtong unta sa A. Borres Street (kanhi Garfield) paingon sa Belgium Street (kanhi T. Bugallon Street) tupad sa kanhi Pasil Fish Market, apan giugbokan og panimalay sa mga mapahimuslanon.