Pagtulon-an sa SARS batok Covid-19
Bisan managlahi ang Coronavirus Disease (Covid-19) ug Severe Acute Respiratory Syndrome (SARS), mas mananakod ang Covid-19 apan mas makamatay ang SARS, may mga pagtulon-an sa SARS nga gisugyot sa mga eksperto nga angayng makat-onan aron makatabang sa pagbadlong sa pagkatap sa bag-ong kagaw:
- Ang pagtak-op sa mga dakbayan ug lalawigan sa China nga labing naigo sa Covid-19 nakapatidlom tuod sa mga kaso sud sa China apan mahimong igo lang nihatag og pila ka semana nga lugway sa ubang kanasuran sa di pa mosulbong ang lokal nilang mga tinakdanay;
* * *
- Mahimong mahitabo sab sa ubang kanasuran ang paspas nga pagsulbong sa mga kaso sa South Korea, Italya ug Iran kay nakagawas na ang kagaw sa wa pa tak-opi ang Wuhan ug Hubei ug kasilinganang mga dakbayan ug lalawigan;
- Kay napamatud-an man sa pasiunang mga kaso sa SARS ug Covid-19 nga ang tinakdanay kasagarang nahitabo sa mga dapit nga tapokan sa daghang katawhan, angayng butangan og mas daghang hand-sanitising stations sa mga tambalanan, shopping malls, restaurants, hotels ug residential complexes;
* * *
- Kay di na man unya maato sa mga tambalanan kon simbako mosulbong ang gidaghanon sa mga masakiton, angayng tutokan ang pagluwas sa mga mag-ungaw sa kamatayon pinaagi sa pag-una pag-atiman sa mga pasyente nga may daan nang mga sakit o grabe na ang kahimtang;
- Apurahon ang mga kompaniya sa pagtugot sa ilang mga kawani nga manrabaho gikan sa ilang mga pinuy-anan ug mga eskuylahan sa pagpadayon pagtudlo nga di na kinahanglang mobiya ang mga tinun-an sa ilang mga panimay; ug
- Ang makapakugang nga pagsulbong sa gatosan ka kaso sa South Korea gikan sa usa lang ka simbahan, ang Shincheonji Church of Jesus, maoy labing lab-as nga pahinumdom sa kadinalian ug kamahinungdanon sa paglikay sa dagkong tapok.
* * *
Apan ang labing dakong bentaha sa kalibotanong mga paningkamot sa pagbadlong sa Covid-19 mao nga mas andam na ang kasagaran sa kanasuran tungod sa ilang kasinatian sa SARS.
Ang paspas nga paglambo sa mga teknolohiya sa niaging 17 ka tuig nakatabang sa mga doktor sa China sa pakigsawo sa ubang kanasuran sa genome sequences sa Covid-19 sud lang sa pila ka adlaw human sa unang pagtumaw sa kagaw.
* * *
- Latest
