Grabeng epekto

Tungod sa isyu kabahin sa Coronavirus Disease (Covid-2019) nga didto unang miigo sa China, wala na gyuy giganahan nga mamalit og mga pagkaon nga gikan sa maong nasud, ilabi na ang mga canned goods.

Dili nato mabasol ang katawhan nga mobati gyud og kahadlok, ilabi na nga daghan kaayong mga fake news nga kuno ang mga patay didto sa maong nasud gikarne ug gihimong delata nga pagkaon.

Makadaghan na ko makakita og mga video nga nagpakita nga adunay mga patay’ng tawo nga gipanglaplap ang kaunoran ug gihimong mora’g baboy nga giihaw. Ambot og diin kadto mahitabo, apan ang maong mga talan-awon nakadugang sa kahadlok sa katawhan nga mamalit og mga delata nga pagkaon nga gikan sa mga nasud sa Insik, apil na gani tingali sa Taiwan.

Basi sa report, nga kapin na sa 2,700 ka tawo ang namatay didto lang sa China tungod sa Corona Virus disease, apan may mga tabi-tabi pa gani nga kuno mas daghan pa nga nangamatay apan wala lang itug-an.

Kita dinhi sa Pilipinas maglisod gyud pagsuta kon tinuod ba ang maong mga tabi-tabi diha sa social media nga wala lang kuno itug-an sa mga tinugyanan sa China ang tinuod nga gidaghanon sa mga nangamatay sa Covid-2019 didto sa ilang nasud.

Wa sab tingali mga media outlets nga ganahang magpadala og ilang reporters didto sa China aron pagkuha sa report, kay nasayod man sila nga table ra ni og nagrisgo sa ilang kinabuhi, ug ikaduha, maglisud sila pagkuha og kasayuran didto.

* * *

Ang Coronavirus 2019, nakahatag gyud og dako kaayong epekto sa mga pamatigayon sa China, ug apil na dinhi sa Pilipinas.  Gani, dunay mga kompaniya sa Mactan nga manirado na lang kay dili na man sila makakuha og mga pyesa gikan sa China.

Daghang pabrika sa China temporaryong nangundang sa ilang trabaho human nga miigo sa ilang nasud ang Coronavirus.  Dinhi sa Sugbo, daghang mga “tourist-oriented business” apektado kaayo kay nimenos gyud ang mga turista nga nanganhi sa Pilipinas.

Apil sa mga nangaalkanse nga negosyo mao ang tourist transport business ug restaurants alang sa mga foreigner kay nimenos na man ang mga turista.

Unta, makabangon ra sila sa paglabay sa mga adlaw.

Pero para nako, ang kabahin wala na pagpalit sa uban og mga karne nga gikan sa mga nasud sa Insik, makaayo kini sa mga tigbaligya og local nga mga karne. Tungod niini, mokusog ang ilang halin.