EDITORYAL - Timeout una sa cellphone, mahimo ba?

Gibuksan na ang Lent Season sugod niadtong adlaw nga Miyerkules pinaagi sa Badlis sa mga Romano Katoliko. Panahon na sa paghinayhinay pagpalandong sa kaugalingon ug espirituhanong pakiglambigit ngadto sa Magbubuhat.

Si Santo Papa Francis nianang adlawa sa iyang mensahe sa mga Romano Katoliko didto sa St. Peter’s Square iyang gidasig ang tanan nga kalimtan o ipadaplin lang una ang naghinobrang pagkagapos sa mga cellphones ug gadgets.

Giawhag niya ang mga magtutuo nga “mo-disconnect” lang una sa naandang pagsige og trolling sa ilang cellphone. Kay dili tanang makita ug mabasa diha sa internet pinaagi sa social media makaluwas sa kalag ug magbunga og maayo sa nagbasa ug sa uban.

Samtang daghan kaayong mga maayong mabasa diha sa internet pinaagi sa cellphones, apan dili man kini maoy gipistahan matag adlaw sa mga tawo kondili kana mang mga fake news, mga tsimis, panglibak sa uban, pagpangdaog, pagbinastos, ug daghan pang uban nga dunay bulok kadautan.

Kaning mga dautang mga post nagsugod lang sa usa ka tawong nagpatik niini diha sa social media. Kaning ilang mga post gidesinyo aron makadani sa mga makabasa aron sa pag-like, pagkomento ug pag-share.

Sa laktod, ang mga netizens nga dili magmatngon kun unsa ilang nabasahan posibleng nagamit nga instrumento sa pagpakatap sa dautan o sa tumong sa yawa aron magdala og kaparutan, kalagot, kawalay pagtahod ngadto sa isi’g kaingon aron makamugna og kasamok ug kasakit.

Ang internet maoy nagsilbing trompa sa pagpakatap niining tanan. Ug kay maayo man ang pagkahimo, ang mga netizens nga magpatara lang pud ug dili mamalandong sa nabasahan, dali ra kaayong mopasa niini ngadto sa uban.

Matud pa sa Santo Papa, panahon karon sa pagpadaplin  aning mga walay pulos nga mga pulong, huhungihong ug tsismis kay mas maayong mamalandong ug makigestorya direkta ngadto sa Magbubuhat.