Pangandam sa pagsulbong
ARANGKADA - Leo Lastimosa (Banat) - February 27, 2020 - 12:00am

Ang pagsulbong sa mga kaso sa Covid-19 gawas sa China nakahatag og sukaranan sa kabalaka nga di takos ang naandan nga mga lagda sa pagsusi kinsa ang natakdan sa kagaw, aron nga mabuwag sa populasyon ug kalikayan ang pagpanakod sa mas daghan.

Apan ang pagtuon sa Imperial College sa London nga nakigtambayayong sa World Health Organization (WHO) nagbutyag nga duha sa matag tulo ka pasyente nga natakboyan sa Covid-19 ug nakagawas na gikan sa mainland China wa mabantayi hangtod. Nga posibleng nisangpot na sa wa pa mabantang nga tinakdanay sa ubang kanasuran.

* * *

Ang nahitabo karon sa South Korea, Italya ug Iran gikahadlokan nga mao say mahitabo sa ubang kanasuran nga nasudlan na sa kagaw.

Labing dakong suliran mao ang kahanap sa ubang mga timaan sa Covid-19, sama sa yanong sip-on, nga lisod mabantayan sa thermal scanners sa mga tugpahanan ug mga pantalan.

May pipila sab ka kaso nga nanakod na ang mga pasyente bisan wa pa mopakita og mga timaan sa sakit. Gitataw hinuon sa WHO nga pipila ra sila ug mas mananakod gihapon ang mga nataptan sa kagaw nga nagsige na og ubo ug atsi.

* * *

Padayon pa sang gilalisan kon unsa kataas ang incubation period sa kagaw sa di pa mopakita ang mga timaan sa sakit.

Gitumbok sa kasagaran sa mga pagtuon ang average nga 10 ka adlaw, mao nga 14 ka adlaw nga quarantine period ang gipatuman sa kasagaran sa kanasuran.

Apan may mga eksperto sa China nga nakakaplag nga may mga kaso nga ang incubation period niabot og 24 ngadto sa 27 ka adlaw.

Maong gitun-an na karon sa ubang kanasuran, apil na sa Department of Health (DOH) sa Pilipinas, ang kahigayonan nga patas-an pa ang mandatory quarantine period sa mga gidudahang natakdan.

* * *

Gipangandaman na sang kahigayonan nga magpadayon ang pagsulbong sa mga kaso. Inay pugngan ang pagkatap, mas maayong itingob ang mga paningkamot sa pagtambal sa mga masakiton. Kay di na maatiman ang tanang gidudahang natakdan.

Gipahibawo nang daan sa Singapore nga kon mahitabo ni ang mga mopakita og gagmay rang mga timaan awhagon sa pagpabilin sa ilang mga pinuy-anan. Aron may igong luna sa mga tambalanan alang sa labing masakiton.

* * *

leolastimosa@gmail.com

PAGSULBONG
Philstar
  • Latest
Latest
Recommended
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with