Lisod pakgangon

Bisan pa man sa gihingusgan nga kampanya sa otoridad ning administrasyong Duterte batok sa negosyo sa gidiling druga, padayon nga nagbaha nga morag walay paglurang ang suplay niini sa Pilipinas, ilabina dinhi sa lalawigan sa Sugbo.

Nagpasabot ba kini nga wala gayud mosalir ug dakong palpak ang estratehiya sa kagamhanan? Sayop ba ang approach niini paghingusog sa kampanya batok sa mga gagmay’ng nalambigit sa druga sama sa mga street pushers?

Nagkalainlain na nga paagi ang gigamit sa kapolisan batok sa maong ilegal nga negosyo. Gani, dili lamang paghingusog sa pagsikop niadtong mga nalambigit sa druga kondili ang pag-rehabilitate niadtong mga grabe nga naadik niini.

Apan daghan ang nakamatikod nga kulang ang paningkamot sa otoridad sa ilang kampanya batok druga. Kini gumikan lagi kay padayon ang dakong sirkulasyon sa shabu, marijuana ug uban pa dinhi sa nasud.

Dinhi lamang sa Sugbo sa niaging semana, halos makabat sa P100 milyones nga kantidad sa shabu ang nasakmit ug daghan ang nasikop sa kapolisan sa ilang sunodsunod nga operasyon batok sa ilegal nga druga sa Metro Cebu ug probinsiya.

Basi lamang sa sunodsunod nga kalamposan sa otoridad, angay lamang usab nga ato silang daygon. Kini tungod kay atong nakita nga wala gayud sila milugak sa ilang kampanya batok sa maong ilang nga negosyo.

Apan subo usab nga palandungon nga bisan pa sa subsob nga kampanya, makalusot gihapon kining ilegal nga druga ngadto sa kadalanan. Morag dili na masulbad pa kining maong problema. Gani, nagkaseryoso na kini dnhi sa nasud.

Usa sa rason niini mao ang padayong agas sa druga gikan sa mga tinubdan niini nga gikan usab sa mga kasilinganang nasud. Matud sa kapolisan nga imported gikan sa China ug Myanmar ang mga druga nga nagsirkular karon sa Pilipinas.

Apan ambot ngano kaha nga lisod man pakgangon sa otoridad ang pagsulod sa druga sa Pilipinas gikan sa maong mga nasud? Hinuon kini maoy dakong pangutana nga angay tubagon sa kapolisan ug ubang hingtungdan.