Kahingawa sa mga molupyo sa Taptap

Nakamugna og kabalaka sa mga molopyo sa bukirang Barangay Taptap sa syudad sa Sugbo nga didto sa ilang dapit dad-on ang mga persons under monitoring sa Coronavirus COVID 19 nga gikan sa mga dapit China.

Sanglit nahukman sa kagamhanan sa dakbayan nga ang CREMDEC building nga naa sa naasoy nga barangay maoy himoong temporary quarantine facility.

Niadtong Biernes, gisusi ni Mayor Edgardo Labella kauban si Dr. Daisy Villa ang CREMDEC building. Hamugaway kaayo ang dapit nga haum alang sa mga tawong i-quarantine diin naay saktong pasilidad nga maghatag usab og kaharuhay sa mga tawo sa sulod.

Murag nag-retreat lang ang mga quarantee kay nindot og matahom nga dapit ang Taptap.

Apan luyo niining tanan ang kahingawa sa mga molupyo tungod kay bugnaw ang ilang dapit og dali ra kuno mosanay ang COVID.

Gani ang mga barangay officials ang gilabhan og away sa mga molupyo kay wala kuno sila konsultaha.

Apan si Mayor Labella ang mihupay personal sa kahadlok sa mga tawo uban kang Dr. Villa nga walay angayan kabalak-an sanglit wala may sakit ang mga dad-on sa CREMDEC tungod kay mga PUM ra man.

Dili usab sila  makasuroysuroy sa komunidad kay didto ra man sila sa compound sa facility.

Atol sa open forum, naay usa ka babaye nga nakigtinubagay sa city health officer ug sa mayor, hinuon naa usab siyay punto.

Imbis maglagot o manginsulto ang mayor nga daw ginawong siya og tubag sa babaye, midayeg naman hinuon siya sa kaisog niini nga moestorya gyud.

Dinhi nagpakita sa iyang pasensya ug pagsabot ang mayor sa mga tawo nga libreng mopadayag sa ilang opinion.

Ang ubang mga lider kon ingon adtoon pagtratar basin giinsulto na o gikasab-an pa, mao kini ang nakalahi sa lider nga makig-level sa mga tawo nga iyang gipasaligan nga serbisyohan atol sa kampanya.

Bitaw dili madala sa kaisog aron mapasabot ang mga tawo kondili sa maayong pakig-estorya o dialogue.