Mantsa sa kampanya

Grabe nga pagkatay-og karon sa tibuok organisasyon sa Philippine National Police niining pagbuto sa bomba mahitungod sa akusasyon sa kalambigitan ni Lieutenant Colonel Jovie Espenido sa negosyo sa ilegal nga druga.

Wala nay sama ka maayong polis ni Espenido kun ang pagsunod sa direktiba ni Presidente Rodrigo Duterte batok sa druga ang hisgotan. Kun sulod pa sa classroom, siya na ang honor student ug hayan ma-valedictorian sa klase.

Matag lugar diin ma-assign si Espenido, mapulbos gayud ang maong ilegal nga negosyo ug kadtong mga nagpaluyo niini. Gani, siya lamang ang nakagupok sa dakong organisasyon sa druga didto sa dakbayan sa Ozamiz ug Misamis Occidental.

Mao nang nahimo siyang poster boy sa kampanya sa administrasyon ni Duterte batok sa druga. Gumikan niini, humot siya sa presidente kinsa kusganong mipaluyo sa iyang kampanya paggukod niadtong mga drug lord.

Apan niining pagkaapil ni Espenido sa listahan sa mga sakop sa kapolisan kinsa giingon mga nalambigit sa ilegal nga druga, maayong pagkabali sa krusada sa gobiyerno. Daghan na hinuon ang mibatikos sa maong kampanya nga wala kunoy pulos.

Hinuon adunay duha ka anggulo nga akong nakita niining kontrobersiya nga naglambigit kang Espenido. Ug kini adunay kalabotan sa isyu pagpanimalos sa mga sindikato kaniya ug ang kasina sulod mismo sa puwersa sa iyang mga accomplishment.

Lisod nga tuohan nga nalambigit si Espenido sa ilegal nga druga. Kini basi sa iyang init nga kampanya batok niini. Apan dili malikayan nga sa kadako sa operasyon sa druga sa nasud, mikapot na gayud ang mga gamot niini sulod mismo sa PNP.

Mao nang dili layo ang posibilidad nga adunay mga sindikato nga nakasulod sa organisasyon ug gusto nga manimalus ug isabit si Espenido sa druga. Ug posible usab nga daghan sa mga kauban ni Espenido ang ang naselos lamang sa iyang accomplishment ug gustong bitaron kini paubos.

Hinuon wala kuno nituo si Duterte sa alegasyon batok ni Espenido. Apan bisan pa man niini, ang maong kontrobersiya nagpakita lamang sa dakong mantsa nga mibuling sa kampanya batok druga.