Cebu City di good provider

Hangtod karon, ang pansayan nga anaa mahimutang sa 2nd floor sa Ramos Public Market ning dakbayan, diin naa mag-opisina ang Cebu City Traffic Office (CCTO), City Traffic Operations Management (CCTO) ug uban pa, nagpabilin gihapong makaluluoy.

Ultimong urinal bowls sa mga lalake, gipamutos na lag plastic. May pipila, gilawalawaan na.  Usab, mga toilet bowl morag gibiyaan na sa palad.

Sa kadaghang naglaray, morag usa o duha na lang ang puwede malumloman panahon sa lawasnong panginahanglan.

Sa akong pag-adto, Pebrero 19 sa buntag, salog nag-umog, matagbaw kag likay nga dili matumban, sa kahadlok nga basig ang maong inaslay, kombinasiyon sa tubig sa faucet ug sa tawo.

Mga toilet bowl walay takob. Kay walay men’s urinal bowl nga kasawran, sa toilet bowl na mopatil-is ang magpabuhagay.

May awas mahipunta sa hugawng salog. Ingon niini kaluod ang maong kasilyas. Busa, imbes molingkod ang gustong moutong, magbinaki na lang sa pagtungtong.

Sa bungbong may pahibalo: “Alang sa tanan:

Aron kalikayan nato nga dili manimahong anso og aron usab nga dili magsunod ang uban sa dili nila hugaw, kami naghangyo nga palihug lang sa pag-flush inig human ninyo og gamit. Ang tubig naa available sa CR sa babaye. Salamat…”

Kini nagtug-an nga ang CR sa lalaki walay tubig. Hakotonon pa.

Ug adto ni kuhaa sa kasilyas sa mga babaye nga may 10 metros ang gilay-on, diin magdalag balde ang mogamit aron maoy i-flush.

Sama nako nga senior citizen na, maglisod gayod paghimo ning maong buluhaton.

Labi nag ang usa ka baldeng alsahon dili pa paigo. Mapugos gyUd paghakot pa more. Friendly pa ba ngadto sa mga magbubuhis kining CR sa Ramos?

How about the employees? Daghan bayag kawani ning mga nag-opisina sa Ramos Public Market. Wala kaha sila mahasol ning maong kahimtang?

Inig human ra bag refill (kaon), sagad, mo-yield (diskarga) baya.

Dili kaha mabasa ilang uniporme inig alsag tubig? Makapanghugas pa kaha silag tarong? Ug usab ang mga kliyente nga manganhi dinhi. Samot na ang mga dato, kinsa naanad og limpiyong CR.

Kini nagpakita, nga ang siyudad sa Sugbo, dili good provider. Nindot unta, nga kahatagan nig dinaliang aksiyon sa kugihan tang Mayor Edgar C. Labella.