Itugot Ginoo nga ang imong sulugoon mohalin na nga malinawon

Kini mao ang pag-ampo ni Simeon sa dihang iyang gisapnay ang batang Jesus sa dihang gihalad kini sa iyang ginikanan didto sa Templo agig sanong sa mando sa balaod ni Moises nga ang tanang mga kinamagulangang lalaki ihalad gyud sa Templo sa Ginoo. Dako kaayo ang kalipay ni Simeon (basaha Lukas 2;22-40).

Ug nagpanlantawan niya ang masanag nga kahayag nga mobuntog sa kangitngit sa mga tawong nahisalaag bisan pa man kun kining maong bata nga iyang gisapnay mamahimong timaan nga supakon sa kadaghanan.

Sa atong kinabuhi, daghan ta og pangandoy. Niadtong bata pa kita, padayon kitang hagiton ug gani dasigon sa atong mga katigulangan nga maghunahuna gyud og mga butang nga dagko ug hamili uyamot. Kini aron mahisama kita ngadto sa mga dagkong tawo.

Mao usab kini ang gipamata kanato sa mga tunghaan nga atong pagaadtoan.

Ang honors, medalya ug uban pa mao man ang sukaranan aron pagatawgon kang bright ug inila sa imong tunghaan. Apan paigo pa ba kini?  Matud pa dunay mga nagkadaiyang ang ang sa atong kinabuhi ingon nga tawo ug kuyog niini ang mga butang kuno nga atong ipanghambog. Naglambigit kini ning mosunod:

1-10 ka tuig padaghanay og duwaan

11-20- padagkoay og grado, padaghanay og amigo amiga o uyab

21-30 ka tuig padagkoay og income

31 -40 padaghanay og sakyanan/panindotay og balay/ pahambugay bana/asawa

41-50- padaghanay og kabit

51-60-padaghanay og sakit

61-pataas panindotay og lungon.

Giingon pa nga mao  kini ang masinati sa matag tawo. Ambot lang ba kaha og tinuod ba apan tingali posible. Kini tungod kay ang tawo dili gyud matagbaw. Padayon siyang nangita sa iyang katagbawan bisan pa man kun kini dakong supak sa sukaranang moral. Sa akong bahin, ako nakaamgo nga mas mahinungdanon gyud ang paghimaya sa Dios gikan sa pagsubang sa Adlaw hangtud na sa pagsalop niini.