EDITORYAL - Pastillas sa NAIA

Pastilan, kun kaniadto sa panahon sa administrasyon ni P.Noy dunay gitawag nga ‘tanim bala’ sa Ninoy Aquino International Airport, karon duna nasay gitawag og “pastillas.” Apan ning higayona dili mga balikbayan ang biktima kondili mga Chinese nationals ug ang gobiyerno.

Matud pa sa nigawas nga balita, lima ka kawani sa Bureau of Immigration sa NAIA ang girelibohan ug giimbestigar nunot sa mga pasangil nga pagdawat og suborno nga gitawag og pastillas aron hatagan og pabor ang mga Chinese national bisan dili angayan.

Ang mga Chinese national nga mobayad og pastillas hatagan og ‘special treatment’ aron sila makasulod dinhi sa nasud nga way daghang kuskos balungos. Kwartang giputos sa sudlanan sa tam-is nga pastillas ang bugti niini.

Giimbestigar karon sa Senado ang maong modus operandi apan sa pagkakaron klase-klase mga sumbong ug impormasyon ang nanggawas bahin sa pangwarta sa pipila ka badlungong mga opisyales sa BI.

Kun unsa ka lawom ang operasyon ug kun kinsa ug pila kaha ka mga opisyales sa BI ang nalambigit sa maong modus, mao nay giatangan karon.

Kahinumdoman nga sa naghinapos nga bahin sa administrasyong Aquino nibuto ang kabahin sa ‘tanim bala’ sa tugpahan.

Ang mga balikbayan maoy gitarget sa mga badlungong kawani pinaagi sa pagbutang og bala. Ug aron dili sila pasakaan og kaso, kinahanglan silang mohatag og kwarta aron makauli sa ilaha.

Ang maong kontrobersiya napitol na ug duna nay nakasohan, apan nagamit sab ang maong isyu sa politika tungod kay naapil man kini sa gisumsoman sa mga netizens samtang naghinangat ang piniliay ug gibasol ang kasamtangang administrasyon kaniadto.

Ang “pastillas” nga modus operandi dili na mabuhat sa mga opisyales sa maong tugpahanan kun walay mga ilegalistang Chinese national nga nagbase na dinhi o mga koneksyon  nila dinhi nga mga Tsinoy ang nagpaluyo.

Sa kadaghan na sa mga Chinese dinhi karon sa Pilipinas, walay nakahibalo kun kinsa kanila ang legal ug ilegal nga nakasulod dinhi. 

Ang uban kanila kakompetensiya pa sa trabaho sa mga Pilipino.