Gisuyaan?

Pila ka adlaw human mosibaw ang kasayuran pagkalakip sa iyang pangalan sa listahan sa mga polis nga giingon’g nalambigit sa illegal nga drugas, gibu-ak ni Lt. Col. Jovie Espenido ang iyang pagpakahilom.

Nangangkon siyang biktima sa demolisyon sa mga sindikato sa illegal nga drugas nga iyang naligsan sa kampanya. Masabot nga nakabaton og kaisog si Espenido pagtubag niining pasangil nga iyang nalambigitan bisan si DILG Secretary Eduardo Año mismo maoy nikumpirmar sa pagkalakip sa iyang pangalan sa listahan sa mga “narco cops” dinhi sa nasud, kini human siya depensahi sa Malacañang.

Si Presidente Rodrigo Duterte mismo miingon nga di siyang motuo nga nalambigit si Espenido sa illegal nga drugas. Ilang gipatugbaw ang pagtuo nga ang naasoy’ng opisyal sa kapolisan, kinsa nahimong nawong sa dugoong kampanya sa administrasyon batok sa illegal nga drugas, biktima lang sa “black propaganda” sa tumong nga gub-on ang iyang kridibilidad.

Mao sab ni ang pagtuo mismo ni Espenido tungod sa kadaghan sa mga gitumbok nga drug lord nga iyang gikabangga ug napatay gyud atol sa operasyon.

Kun atong sakyan ang maong pagtuo buot ba nga ipasabot nga ang mga naghimo sa listahan nagpagamit sa sindikato sa drugas?

Kun mao, dili igo nga wala motuo si Presidente Duterte sa listahan, angayang dunay buwag nga imbistigasyon nga imando ang Malakanyang pag-ila kinsa ang mga tawo nga responsable sa paghimo sa maong listahan.

Angayang masayran kinsay nagbutang sa pangalan ni Espenido sa maong listahan aron atong masayran ang iyang motibo ug kun wala ba siya modawat og suhol gikan sa sindikato aron gub-on ang kridibilidad sa opisyal. Seryoso ang maong butang tungod kay naapiki niini ang kridibilidad sa kampanya sa gobyerno batok sa illegal nga drugas.

Nituo ko sa kaligdong ni Espenido ug nga siya biktima lang sa grabing politika diha sa organisasyon sa kapolisan.  Dako ang akong pagtuo nga tungod sa paghumot og maayo sa pangalan ni Espenido ngadto ni Presidente Duterte, daghan siya og naligsan sa iyang mga kaubang polis sa natad sa promotion.

Sa laktud gisuyaan siya sa iyang mga kaubang opisyal labi pa kadtong nahulga sa iyang kasuod sa presidente. Kun nahinumdom mo buot sa presidente nga ibutang si Espenido isip hepe sa Ozamiz City apan gibabagan siya tungod kay ang posisyon nagkinahanglan og ranggo nga full colonel.

Dunay kultura ang kapolisan ug militar nga kadtong mga opisyal lang nga gradwado sa Philippine Military Academy (PMA) o ba kaha sa Philippine National Police Academy (PNPA) maoy sagad makahupot og pwesto. Si Espenido nahimong opisyal pinaagi sa lateral entry.