Dehado ang Pilipinas

Dili na gayud masalbar pa ang Visiting Forces Agreement tali sa Pilipinas ug Estados Unidos. Kini human nga walay kabalakang miuyon usab si US President Donald Trump sa lakang ni Presidente Rodrigo Duterte pagbasura na sa VFA.

Matud pa ni Trump nga mas maka-save ang iyang administrasyon og milyones paghawa na gyud sa presensiya sa iyang kasundalohan dinhi sa nasud, lakip na ang mga military exercises tali sa US ug Philippine military forces.

Siguro alang kang Trump, mas klarong dehado ang Pilipinas niining pagwagtang sa military agreement. Kini kay dili na unya makatabang ang Estados Unidos sa natad pagpalambo sa armadong puwersa sa nasud.

Hinuon, kun angay lamang nato sabton, dili tiaw ang natabang sa Amerika sa Pilipinas kun pagpalambo sa militar ang hisgotan. Kini wala pay labot sa pipila na ka dekada nga maayong relasyon tali sa duha ka nasud.

Gawas nga nakatabang ang Estados Unidos pinaagi sa pagdonar og mga kahimanan ngadto sa atong kasundalohan, dako usab og nakuhang kinaadman ang atong militar sa mg joint exercises uban sa kasundalohan sa Amerika.

Ang problema karon mao nga nahimong biktima ang VFA sa inanay nga pagkiling sa Pilipinas ngadto sa China ug Russia nga padayong mi-challenge sa pagka-superpower sa Estados Unidos, kansang influence ang inanay nang nahanaw sa Asia.

Apan dili nato isalikway ang realidad nga niining pagkabungkag sa VFA, misamot ka vulnerable ang nasud gikan sa mga outside forces, ilabina sa China, kansang presensiya ang miukopar sa dakong porsiyon sa South China Sea. Dili kawad-an sa Estados Unidos ang pagputol ni Duterte sa VFA. Klaro nga lugi ang Pilipinas, ilabina niining panahona nga kulang kita sa kahimanan pag-isa sa kapabilidad sa atong armadong kusog. Ug walay laing nakabentaha niini kondili ang China.