Kisaw sa politika

Nianam na og sihag ug ang tukmang panahon nalay gipaabot aron maklaro ang linya sa politika tali sa kampo ni Cebu City Mayor Edgardo Labella ug Bise Mayor Michael Rama.

Abunda ang mga timailhan nga sa di madugay masi-ak ang alyansa sa Team Rama ug PDP-Laban dinhi sa dakbayan.

Ang labing awahing sinyales mao ang dayag na nga pagsukol ni Konsehal Dave Tumulak batok ni Rama.

Niadtong Miyerkules, atol sa regular session sa konseho, nagsininghagay si Rama ug Tumulak nunot sa budget alang sa pangandam sa dakbayan pagsanta sa pagkatap sa coronavirus disease.

Gipatangtang man gud ni Rama ang kapin sa P13 milyones nga gahin alang sa training sa mga barangay health workers ug sa mga health responders unsaon pagtubag sa higayon nga dunay kaso sa coronavirus disease dinhi sa atong dakbayan.

Dako og kahulogan sa relasyon sa duha ka kampo ang maong hitabo. Si Tumulak nga sakop kanhi sa Team Rama, nitabok sa BOPK sa miaging eleksiyon apan nakig-alyansa pagbalik sa administrasyon ni Labella.

Usa sa kasaligang tinubdan nibutyag nga si Tumulak gikonsiderar sa kampo sa PDP-Laban alang sa mas taas nga posisyon sunod eleksiyon maong kinahanglan siyang pagpabilib.

Sayo ug labihan pa ka "fluid" sa sitwasyon apan sigun sa kasaligang tinubdan, gitan-aw si Tumulak nga posibling kandidato pagkakongresista sanglit anaa na siya sa katapusang termino isip konsehal.

Laing gitan-aw sa kampo sa PDP-Laban mao si LTO-7 director Victor Caindec.

Apan ang labing makapakugang nga kasayuran mao nga dunay bag-ong kandidato pagkamayor ang grupo sa PDP-Laban.

Kun way kausaban sa plano, matinuod ang dugay nang gihugonhugon nga mokandidato pagkamayor si Presidential Assistant for the Visayas Michael Dino.

Si Labella gikatahong mas interesado nga magkongresista sa north district sanglit mapupos na ang termino ni Kongresista Raul del Mar.

Posibling mamahimong runningmate ni Dino si konsehal Raymund Garcia.

Kun mahitabo, dako ang purohan nga "three-cornered fight" ang pagkamayor sa dakbayan sa 2022.

Si Dino sa PDP-Laban batok ni Rama ug sa kandidato sa BOPK nga posibling si ABC President Franklyn Ong.

Posible sab hinuon nga mag-usa ang BOPK ug si Rama sanglit gikatahong duna nay mga nahitabong tigom tali sa duha ka kampo.