Dili pwede ang self-service!

Usa ka inilang pari nga Katoliko nga si Fr. Fernando Suarez, kinsa gianggaan usab nga “Healing Priest”, mitaliwan na ni’ng kalibutana human makasinati og atake sa kasingkasing.  Gibantog si Fr. Suarez sa iyang pagpanambal sa sakit sa ubang tawo, apan ni’ng higayona, wala niya matambali ang iyang kaugalingon.  Kon balatian na diay ang hisgutan, dili gayud tingale magsilbi ang konsepto sa “SELF-SERVICE”, sama sa gipatuman sa uban’g restaurant. Bisan sa iyang kaalam sa pagpanambal, ang tawo dili gayod diay makasundog sa mananap nga motambal lang sa ilang kaugalingon.  Busa hinumdomi, kon masakit ka, “strictly no self-service” ha.  Tua ra!

WA PA MADAKPI ANG MGA ILAGA

Matud ni Cebu City Attorney Rey Gealon, mahimong mag-atubang ang mga barbecue vendors sa Larsian og kaso, ingon man pagbawi sa ilang mga permiso, o di ba kaha pagsirado sa ilang mga stalls kon masuta nga aduna gayud silay kalapasan sa lagda sa sanidad. Napiho human sa pakisusi nga adunay mga ilaga, ok-ok ug langaw ang maong barbecue strip.  Naglisod pa tingale pagpahamtang sa silot ang kagamhanan kay wa pa man madakpi ang mga ilaga, ok-ok ug langaw, busa wala pa’y nakatug-an kon asa sila nga stall mag-istambayan.  Na hala, mga ilaga, ok-ok ug langaw, tago na kamo.  Hala no!

PALEHO LA NGA SONATA

Gitataw ni DICT Undersecretary Eliseo Rio nga wala siya mamasangil nga adunay anomaliya sa maong ahensya mahitungod sa paggamit sa P300 milyones nga budget niini alang sa confidential funds. Apan midugang siya nga ang hinungdan sa iyang pag-resign mao nga gilabyan lang ang iyang awtoridad isip Undersecretary sa Operations sa maong ahensya labi na sa paggamit sa confidential funds.  Bisan nausab ang tunada sa kanta ni Undersecretary, mora’g susama ra man gihapon ang lyrics sa iyang awit.  Sa Iningles pa, ‘the difference is the same’.  Bisan pa’g usbon, Paleho la gihapon!

DI NA DUTLAN SA KAGAW

Segun sa balita nga gimantala sa Xinhua News Agency , unom (6) ka opisyal sa dakbayan sa Huanggang, silingan nga dakbayan sa Wuhan, China, ang gipapha sa ilang katungdanan tungod sa ilang dili maayong “performance” sa pagdumala sa corona virus outbreak.  Dinhi sa Pilipinas, ang giakusahan nga mga opisyales nga mipasiugda sa bakuna nga Degvaxia nga gituohan nga maoy hinungdan sa kamatayon sa daghang kabataan, padayon pa gihapon nga nagtrabaho sa kagamhanan.  Mas immune diay ang atong mga opisyales kon itandi sa mga opisyales sa ubang nasod. Kay dili na man sila madutlan bisan sa labing isog nga kagaw sa KA-UWAW.  Por vida!