Hagit sa media ug gobyerno

Sa panahon sa krisis sama sa nasinati sa kalibutan karon tungod sa hulga sa makamatay nga kagaw gikan  sa Wuhan,China, importante ang husto ug tukma nga kasayuran gikan sa mga hingtungdang ahensiya ug opisyal sa gobyerno.

Pinaagi sa tukma nga mga kasayuran magiyahan ang publiko sa angayang buhaton ug malikayan ang kahadlok nga way basihanan. Kini tungod kay ang pagkatap sa dili tukma nga mga kasayuran mamahimong hinungdan sa kalisang sa publiko nga moresulta sa kaguliyang ug pagpahimulos sa mga mapahimuslanon.

Apan tungod sa dili husto nga paggamit sa teknolohiya nahimong usa ka dakong babag ug hagit karon dili lang sa gobyerno kon dili lakip na sa mga sakop sa media ang pagpaabot sa tukma nga kasayuran.

Ang teknolohiya mipagamay sa kalibutanong kumonidad. Pinaagi sa social media dali ug paspas kaayo ang pagkuyanap sa impormasyon, apil na ang peke nga mga kasayuran.

Ug subo nga hunahunaon nga niining bahina, gilupig ang mga sakop sa media ug ang mga ahensiya sa gobyerno sa mga tigpakatap sa sayop nga mga kasayuran mahitungod sa sakit nga dala sa novel coronavirus (2019-nCoV).

Pruweba nga mas daghan ang mituo  sa mga sayop nga kasayuran mahitungod sa nCoV mao ang reaksiyon sa publiko human gikumpirmar sa Department of Health ang unang kaso dinhi sa Pilipinas niadtong miaging semana.

Midagsa ang mga tawo sa mga tindahan og facemask nga miresulta sa pagkuwang karon sa supply. Ang mga mapahimuslanong negosyante mipaburot og maayo sa presyo ug bisan klarong gipahimuslan, dili igsapayan sa kadaghanan ang mahal nga presyo sa pagtuo nga sila kapanalipdan gikan sa sakit.

Kun nagsusi ug naminaw lang ang maong mga tawo sa tukmang kasayuran mahitungod sa nCoV, ilang masayran nga dili kinahanglang makig-ilog sila ug mopalit sa mahal kaayong face mask.

Ang epektibo nga panagang gikan sa makamatay nga kagaw mao ang kanunay’ng pagpanglimpiyo sa imong kaugalingon. Batasana ang pagpanghunaw ug gamit og alcohol.

* * *

Laing subo ka kamatuoran mao ang kainutil sa atong gobyerno pagbadlong sa mga mapahimuslanon. Bisan klarong gipaburot na ang presyo sa facemask, way konkretong lakang nga gihimo ang Department of Trade and Industry ug ang lokal nga kagamhanan sa dakbayan sa Sugbo pagsanta niini.

Kun wala pa pangutan-a sa media si Mayor Edgardo Labella sundon ba niya ang gihimo ni Manila Mayor Isko Moreno pagsikop ug pagtrangka sa mga tindahan sa mga mapahimuslanong negosyante, wala moluwat og hulga ang mayor.

Dili pa hinuon uwahi ang tanan,  apan hinaut nga dili kutob lang sa laway ang bahad sa mayor.