Limpyo na

Gilimpiyohan sa Malakanyang ang kanhi District Collector sa Bureau of Customs sa Port of Cebu nga si Atty. Elvira Cruz kinsa girekomendar sa Bureau of Customs (BOC) ug Presidential Anti-Corruption Commission (PACC) nga silotan ug tangtangon sa katungdanan tungod sa kasong Gross Neglect of duty.

Ang Malakanyang mibasura sa rekomendasyon sa Bureau of Customs ug Presidential Anti-Corruption Commission tungod sa kakuwang sa basihanan niini.

Ang Malakanyang nakakita sa katalagsaon sa gipagawas nga rekomendasyon sa BOC ug PACC sa pagsilot ug pagtangtang ni Collector Elvira Cruz tungod kay wala ikonsiderar ug paminawa nila ang depensa sa naulahi.

Si Atty. Elvira Cruz, kinsa mao ang District Collector sa Port of Cebu sa BoC, giimbistigahan ug gipasakaan og kasong administratibo nga Gross Neglect of duty tungod sa pagdiskarga sa mga kargamento nga mga bug-at nga ekipos ug mga mahalong sakyanan nga gikarga sa usa ka langyaw nga barko nga M/V Tion Woon Ocean nga midunggo sa pantalan sa Liloan niadtong Mayo 22, 2018 apan gibalhin kini sa usa ka pribadong pantalan sa lungsod sa Pinamungajan nianang pagka Mayo 27, 2018. Ang kargamento gidiskarga bisan wala pa makabayad og buhis ang tag-iya niini.

Tungod ning maong iregularidad, nagpatawag og emergency meeting si Cruz ug miawhag sa Customs commissioner sa pag imbestigar sa mga tawo nga nagpaluyo sa iregularidad, ilabi na sa hepe sa Bonded Warehouse Division nga si Rogelio Raffinan ug sa deputy collector for operations nga si Lilibeth Mangsal. Gipanghimakak usab ni Cruz nga siya ang mipagawas sa routing slip alang sa kargamento.

Ang Malakanyang mikonsiderar sa findings sa BOC ug PACC nga unusual tungod sa kapakyas niini sa pagkonsiderar sa rason ug depensa ni Cruz ug sa kapakyas niini sa pagpakonpirmar kang Raffinan kun si Cruz ba gayod ang nagpagawas sa routing slip.

Ang Malakanyang milimpiyo ni Cruz ug mimando sa BOC sa paghimo og laing imbestigasyon.