Panagang sa nCoV

Pipila ka adlaw human mianunsiyo ang Department of Health mahitungod sa presensiya sa unang kaso sa makamatay nga 2019 Novel Coronavirus (nCoV) dinhi sa Pilipinas, miabot na ang mas labing makahahadlok nga balita.

Usa ka lalaki nga Chinese national ang namatay samtang naadmit kini didto sa San Lazaro Hospital didto sa kaulohan tungod sa nCoV. Siya ang partner niadtong Intsik nga babaye nga nataptan usab sa maong sakit ug nga maoy unang kaso sa nCoV sa nasud.

Kahinumdoman nga ang maong magtiayon niabot sa Pilipinas gikan sa Hong Kong pinaagi dinhi sa Cebu. Hinuon kutob ra sila sa Mactan Cebu International Airport ug milahos ngadto sa ilang destinasyon sa dakbayan sa Dumaguete.

Apan sa dihang mipakita og simtomas sa flu ang kauban niyang babaye, giadmit dayon kini ngadto sa San Lazaro Hospital. Apan misunod usab ang maong lalaki pagpakita og simtomas, ug migrabe ang iyang kondisyon hinungdan sa iyang kamatayon.

Ang kamatayon sa maong pasyente maoy unang kaso sa nCoV fatality gawas sa China, diin subra na sa 300 ang nangamatay ug dul-an 14,000 ang nalandig sa hospital, ilabina didto sa siyudad sa Wuhan, ang epicenter sa maong sakit.

Insakto lamang ang order ni Presidente Rodrigo Duterte pag-ban niadtong mga gikan sa China, Hong Kong ug Macao pagsulod sa Pilipinas aron pagpugong sa pagkatap pa sa maong sakit. Hinuon, maayong maklaro nga Intsik man o laing nasyonalidad basta gikan sa maong mga lugar, sirado gayud ang ganghaan sa nasud.

Hilabihan ka daghan sa mga turistang Intsik ang motugpa sa nasud matag adlaw aron pagbisita sa mga resort ug ubang tourist destination dinhi. Ug tungod niini, dako gayud nga epekto ang mitumaw nga nCoV sa atong industriya sa turismo .

Hinuon maayo nang managana kitang daan taliwala niining seryoso ug makamatay nga sakit. Kini gumikan sa ka kusog pagkuyanap niini sa ubang kanasuran. Gani, pangagpas sa mga eksperto nga dugay pang molurang ang maong balatian.