Daan na nga factory defect

Naglaraw ang National Capital Region Police Office (NCRPO), pinangulohan sa ilang hepe nga si Maj. Gen. Debold Sinas, nga molusad og programa alang sa mga tambok ug dagko’g tiyan nga mga polis sa tuyo nga mokunhod ang ilang timbang. Bisan pa sa madasigon nga awit ni Yoyoy Villame nga nagkanayon, “Mag-exercise kita sayo sa buntag”, nagtuo akong higala nga, sama sa una, dili magmalampuson kining maong programa tungod kay adunay mga tawo nga dagko na daan ang tiyan nga gitawag niya nga “FACTORY DEFECT’.  Nagpaukyab na sab ang Polis.  Saoonz!

Small knowledge, dangerous

Taliwala sa nag-alintabo’ng balita bahin sa giila na karon nga pandemic nga new corona virus kon nCov, daghan gilayon ang mga eksperto nga mikalit lang pagtumaw ug nahimugso nga yano lang mipadayag sa ilang nagkadaiyang mga opinyon, panahum ug mga pagpanaway diha sa social media.  Naumol ang ilang komentaryo gumikan sa ilang kalisang, o sa sayop nga pagtoo nga sila manggi-alamon o di ba kaha tungod lang sa ilang yano nga pagkahanggaw.  Tukma dinhi ang giingon sa akong apohan nga “Small Knowledge, Dangerous”.  Alegre ang demokrasya!

Amendahon ang balaod

Human mopahibawo ang Department of Health nga aduna na’y una’ng kumpirmado nga kaso sa 2019 novel corona virus (2019 n-Cov) dinhi sa Pilipinas, naglumba gilayon ang publiko sa pagpamalit og mga surgical masks hinungdan sa pagkahurot sa maong palaliton sa mga tindahan.  Tungod sa kanihit sa supply, misaka usab gilayon ang presyo sa mga surgical masks. Daghan gayod ang mga mapahimuslanon.  May punto ang giingon sa usa ka pangulo kanhi sa nasud nga buot niya nga ipa-amendar ang “Law on Supply and Demand”. Hala no!

Atribido ang LTFRB

Sa susamang kalamboan, miluwat usab ang Land Transportation Franchising and Regulatory Board (LTFRB) og direktiba nga nagmando sa mga drayber sa mga public utility vehicles sa pagsul-ob og mga protective masks ingon man pagbutang ug mga hand sanitizers alang sa mga pasahero.  Ang dili motuman sa maong kamanduan pagamultahan.  Public health issue man tingale ang new corona virus ug dili mahitungod sa pagmaneho sa pangpublikong sakyanan sa kadalanan.  Di man gani hingpit makapatuman ang LTFRB sa mga yanong lagda sa kadalanan, mag-apil-apil pa jud.  Atribido ang LTFRB!