Kobe pinangga sa Ginoo

Usa’g-usa nato gihataga’g iya-iyang talento ug abilidad sa Ginoo. Iya ning gihatag aron masayran kinsa sa iyang mga binuhat ang kaantigo mopalambo, mopadaghan ug mopaambit niini ngadto sa mga nanginahanglan. Bulahan kadtong makamao nga mopalipang ug walay kukawiling mipahat niini sa iyang isig ka tawo kay pun-an pa kini sa Ginoo og laing daghan.

Ingon niini ang gibuhat ni NBA legend Kobe Bryant sa talento ug abilidad nga gihatag sa Diyos kaniya. Bata pa siya, iya kining gialimahan, gibisbisan sa iyang mga singot kada adlaw ug dihang mitubo sa kahimsog, iyang gitaak ang uniberso sa NBA, diin nakab-ot niya ang nagkidlapkidlap nga mga bituon sa kabantog.

Nahimo siyang 5-time NBA champion, 2-time NBA Finals MVP, NBA Most Valuable Player, 2-time Scoring champion, 18-time NBA All Star, 15-time All-NBA Team selection ug daghan pa unta nga gusto kong ipadayon apan limitadog espasyo kining atong lindog ug basig dili na masulod.

Dili dawo si Kobe. Gi-share ang iyang abilidad sa basketbol ngadto sa iyang isig ka ingon. Gani, sa kapobre ug kalayo sa Pilipinas, mianhi-bisita siya sa ato ug mipahigayog Basic Basketball Clinic didto sa Manila aron maagak-dasig ang mga bag-ong tubo, kinsa mahilig modulag basketbol.

Lakip sa iyang dakong kita sa NBA, iya pong gipahat sa katawhan pinaagi sa paghatag og hinabang pinansiyal ning mosunod nga charitable foundations: After-School All-Stars, Aid Still Required, Kathy’s Kid Foundation, Kobe and Vanessa Bryant Family Foundation ug uban pa.

Bisag daghan nag kuwarta si Kobe, wala gyud mobulag sa Ginoo. Hinimba siya labaw nag Domingo. Gani, kuyog ni Gianna, iyang anak, nanimba man sila sa 7a.m. Catholic Mass sa Cathedral of Our Lady Queen of the Angels, Newport Beach, ug mikalawat sa Pan sa Kinabuhi sa wala pa makras ang helikopter nga ilang gisakyan.

Nakita sa Ginoo ang kabuotan ni Kobe nga gitudlo pong Bryant sa mga anak niya. Namatud-an sa atong Magbubuhat nga di na mausab ang langitnong hiyas ni Kobe bisag paaboton pag 200 years ang edad niini.  Busa, bisag 41 anyos pa lang si Kobe, Iya nang gi-recall aron papuy-on didto sa giandam na Niya daang pinuy-anan sa langit. Pagkatalagsaon nga matang sa pagpangga. Makapahinuklog!