EDITORYAL - Kutob lang sa tunglo ug kalagot

Sunog sa Sitio Panagdait sa Barangay Kasambagan sa Dakbayan sa Sugbo niadtong Domingo sa hapon giingong tinuyo ug binuhatan sa usa ka miangkong tiggamitan og illegal nga drugas.

Gani ang suspek miangkon pa nga nakasuyop siya sa dihang iyaha kining gibuhat tungod sa iyang kalagot ngadto sa mga silingang gipasanginlan siyang asset sa polis.

Ang iyang gibuhat nakapalagot sa iyang mga silingan nga nangapagan ug ingon man sa mga netizens nga nakabasa sa gipatik sa Banat News Facebook anang adlawa.

Dunay uban nga gitunglo ang maong arsonista, bisan og dili sila personal nga kaila. Ingon niana kasuko ang mga tawo batok sa mga drug addicts.

Masabtan man ang ilang reaksyon, apan ang dili masabtan mao nganong hangtud karon wala man gihapon mapuo ang illegal nga drugas diha sa ilang mga tagsatagsa ka barangay?

Nitabang ba sila sa mga otoridad pagtug-an kun kinsa kining mga nalambigit sa illegal nga drugas diha sa ilang lugar? Nakaako ba sila pagsumbong sa ilang igsuon, amahan, anak, inahan ug mga kadugo nga tiggamitan o tigbaligya og illegal nga drugas?

Usa ka dakong hulga gyud sa kaugmaon sa Pilipinas kining illegal nga drugas gumikan sa epekto niini sa panghunahuna sa mga tiggamitan niini sumala pa ni Pres. Duterte .

Iyaha kining linya aron pangusgan ang iyang war on drugs. Kun siya pay pasultihon wa na silay tarong paminsar kondili ang paghimo lang gyud og krimen.

Apan dili tanang tiggamitan og illegal nga drugas dili na matabang pa, ang kuwang mao ang kooperasyon sa tanan sa maong kampanya gikan sa pamilya, katilingban ug sa mga otoridad.

Samtang ngilngig ug makapaisog paminawon ang “war on drugs” sa pangulo, apan daghan ang nagtuong miabusar ang mga otoridad sa pagpatuman niini.

Sa uban nga wala kaayo makasabot ug kalagot ra maoy nagpasulabi para kanila uyon sila sa pamaagi, apan sa uban mas gusto nilang sa hustong proseso kini himuon nga mao gyud untay husto.