Mga tinagoan sa DOH ug BOQ
ARANGKADA - Leo Lastimosa (Banat) - January 25, 2020 - 12:00am

Ambot namakak ba, o nataligam-an lang, may sayop ang unang pahibawo sa Department of Health (DOH) ug Bureau of Quarantine (BOQ) mahitungod sa 5- anyos nga batang lalaki gikan sa Wuhan nga gidudahan nga natakdan sa bag-ong kagaw sa coronavirus.

Niingon sila nga nabantayan sa thermal scanners sa Mactan Cebu International Airport (MCIA) ang bata maong nada dayon sa tambalanan uban sa iyang inahan. Apan human sa pila ka adlaw niangkon ang DOH ug BOQ nga wa diay mabantayi sa thermal scanners ang bata bisan nagreklamo nang lain ang iyang gibati.

* * *

Nagduda na kong daan sa ilang kasayuran kay nagkasungi ang ilang mga detalye unsang orasa nga nitugpa ang flight sa bata ug sa inahan sa MCIA niadtong Enero 12:

• Ang BOQ niingon nga alas-3 sa hapon nitugpa ang flight ug alas-6 sa gabii nasud ang bata sa tambalanan; apan

• Ang DOH niingon nga alas-2 sa kaadlawon nitugpa ang flight (mas sayo og 13 ka takna) ug wa maghisgot unsang orasa nasud ang mga pasyente sa tambalanan, sa samang adlaw o sa sunod adlaw ba.

* * *

Dako og implikasyon sa kahimsog sa publiko ang pagsuway og tago sa kapakyas sa pagsusi dayon sa sakit sa bata:

• Sukwahi sa unang pangangkon sa DOH nga ang 12 ra ka doktor ug nurses sa MCIA ug tambalanan nga nakahikap sa bata ang gipanid-an;

• Karon kinahanglan na nilang susihon ang kahimtang sa panglawas sa tanang nakaduol sa bata gikan sa paggawas sa tugpahanan, pag-adto sa temporaryong pinuy-anan ug dayon sa tambalanan ug sa mga sakyanan nga ilang nasakyan.

* * *

May laing atraso ang DOH: Mas uwahi nilang gipahibawo ang mas una pa diay nga gidudahang kaso sa coronavirus sa laing Chinese national, nga ilang nakaplagang negatibo.

Bisan ang mas nabantog nga tigtago og kasayuran nga China gawasnon nga nipahibawo sa tanang gidudahang kaso, nag-positibo o nag-negatibo man.

Mapapas hinuon ang komplikasyon kon mapamatud-an sa laboratoryo sa Australia nga di ang bag-ong coronavirus gikan sa Wuhan ang nakatakod sa bata.

Apan angayng magmatngon ang DOH ug BOQ, bisan kun ang ilang tuyo mao ra tingali ang paglikay nga ma-alarma ang publiko, kay ang kaligdong nga mawagtang lisod nang bakwion.

* * *

leolastimosa@gmail.com

CORONAVIRUS
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with