Habalhabal kuyaw

Ang motorsiklo duha ray ligid. Gidesayin alang sa duha lang ang makasakay: ang drayber ug ang angkas. Usahay, makalingolingo ka. Kay ang duha nahimong tulo ug may panahon pang maupat. Labi na sa mga sudlonong lugar nga tagsa rang puwestuhan og polis.

Pipila ba ka higayon nga may magtiayong magmotorsiklo kauban ang masuso pang anak? Pipila ba ka ulo sa mga motorista ang nangabuak sa dugoong binanggaay kay wala mag-helmet?

Gikasugat nakong motorsiklo (dugay na nuon ni), nakadam-ag og iro. Naulpot ang drayber, nahimulag sa motorsiklo ug naglumbaanay ang duha pagsawom paingon sa akong gidraybang Sports Runner nga dali kong gipahunong sa may hustong gilay-on. Apan, naabot gihapon sa nabagnos nga motor.

Sugo sa dili masabot nga pagbati, dali kong nanaog aron susihon unsay damage: sa tawo ug sa sakyanan? Pastilan, paspasang nakabangon sa drayber. Nagdalidali nga mibunlot sa iyang motor ug tuling mipadagan palayo sa akong nahimutangan. Ngano kaha?

Ingon ini kabadlungon ang pipila ka habalhabal driver. Daganan ka, kun sila nakasala.

Dinha lang sa main roads, diin maghuot ang mga nagpaabot  behikulo, kanus-a mo-Green ang Red Light sa nagkurus nga mga dalan, ang nagmotorsiklo (habalhabal man, o dili) morag maoy tag-iya sa karsada. Bisag asa lang agi, dikit ug lusot. Nalimot, nga ang manobelang iyang gidala, iyang kinabuhi ug kinabuhi sa iyang pasahero.

Kuyaw himoong pasaheroan ang sakyanan nga duha ray ligid. Wala kini mga bungbong ug atop nga moprotehir sa mga sakay panahon sa pagbiyahe.

Segun sa akong pangagpas, pipila kini sa mga hinungdan nganong girekomendar sa taga Technical Working Group (TWG) ang pagpahunong sa pipila ka buwang gihimong pilot test, diin kun maaprobahan, pangdakpon na usab ang mga drayber sa ANGKAS ug tanang motorsiklong namasahero.

Tinuoray, sakit kaayo kun sa kalit, mawad-ag inadlawng  panginabuhian ang habalhabal drivers. Labi nag ang motorsiklo nga ilang gigamit, inutang. Ug mas sakit ang paghunahuna unsaon pagpruweba nga ang mga pasaherong sakay sa habalhabal, kanunayng luwas sa giatubang nilang inadlaw nga kakuyaw.

Importante sa mga habalhabal drivers nga ilang makombinser ang taga LTFRB bahin ning maong isyu samtang ang gikahadlokang rekomendasiyon sa TWG wala pa maaprobahi.

Kay oras nga mahimo na kining balaod, pastilan, ‘goodbye, hanapbuhay!’