Way kaso

Mitungha kagahapon didto sa buhatan ni Konsehal Joel Garganera sa dakbayan sa Sugbo ang lalaki diha sa video nga nag-viral sa social media tungod sa pagpamahid niya og luwa nga gisagol sa pintal ngadto sa mga mitambong sa Sinulog niadtong Domingo.

Si Jayson John Tapales nga taga dakbayan sa Danao mapaubsanon nga nangayo og pasaylo sa iyang gibuhat. Dako kuno ang iyang pagbasol sa nahitabo ug nahadlok siya karon sa iyang siguridad tungod sa kadaghan sa mga nasuko sa iyang gihimo.

Apan daghan ang wala matagbaw sa pagpangayo niya og pasaylo. Dunay miingon nga angayang prisohon siya aron dili mahimong panag-ingnan sa uban.

Samtang dunay mga misugyot nga silotan siya pinaagi sa pagbuhat og community service sama sa pagpanglimpyo sa karsada ug uban pa.

Nindot unta ang maong mga sugyot apan ang pangutana unsay basihan diha sa balaud pagpahamtang niini ngadto ni Tapales?

Ang labing batakang pangutana, duna bay balaud siya nga nalapas sa pagpamahid og pintal nga dunay sagol nga luwa? Way lalis nga dili gyud husto ang iyang gibuhat ug ang mga tawo lang nga hugawan ug kuwang sa kabuot maoy mohimo niini.

Apan dili paigo nga nasayod ta nga dili husto ang iyang gihimo, gikinahanglan nga dunay balaud nga mosilot sa pagbuhat sa ingon.

Dinhi sa dakbayan sa Sugbo dunay City Ordinance 1361 nga nagdili pagpangluwa bisan asa.

Duna ni multa nga P500 o ba kaha community service depende hain sa maong mga silot ang imong gusto. Ang pangutana apil ba niini ang pagpamahid og luwa ngadto sa laing tawo?

Tingali panahon na nga tun-an sa mga sakop sa konseho sa dakbayan ang pagpalabang og balaudnon nga magdili sa ingon niini nga mga kalihukan panahon sa Sinulog.

Ug ang labing importante, istrikto nga ipatuman ang pagdili sa inom tungod kay sa akong naobserbahan daw hubog na si Tapales dihang mihimo siya sa pagpamahid sa iyang luwa.

Ang hinungdan nganong nagkaguliyang ang kadalanan atol ug human sa Grand Parade  mao ang labihan ka daghang hubog.

Dili ba mahimong saulogon ang Sinulog nga way inom? Kun ang maong kasaulogan pahinungod sa Balaang Bata nga si Señor Sto. Niño angayang hugot nga i-dili ang inom.

Si Mayor Edgardo Labella miluwat og executive order niadtong nagsing-abot ang Sinulog nga nagpatuman sa liquor ban diha sa Sinulog route. Apan ang problema kay way nipatuman niini.