Wa pa sa Sugbo ang kagaw sa China
ARANGKADA - Leo Lastimosa (Banat) - January 22, 2020 - 12:00am

Nakadawat ko og mga mensahe nga nipasidaan nga nakasud na sa Sugbo ang misteryusong kagaw gikan sa Wuhan, China. Susama ang mga mensahe nga ilang gipakisaw-an.

Ang pipila niawhag nako sa pagsusi unsa katinuod ang kasayuran. Ang uban niawhag sa pagtabang pagpakatap sa pasidaan.

Akong gitawgan ang Department of Health (DOH), Bureau of Quarantine (BOQ), Mactan Cebu International Airport (MCIA) ug mga tambalanan nga giingong niatiman sa mga pasyente nga natakdan sa kagaw. Silang tanan nipahibawo nga sayop ang kasayuran ug namalihug sa pag-awhag sa publiko sa paghunong pagpakatap sa bakak.

* * *

Nagpasalamat ug nakaginhawa og luag ang kasagaran sa mga nagpada sa mensahe dihang akong giingnan nga sayop ang kasayuran nga ilang nadawat.

Apan may pipila nga niinsistir nga tinuod ang kasayuran ug di ni angay’ng tagoan gikan sa katawhan.

Giawhag ko nila sa di dayon pagtuo sa DOH, BOQ, MCIA ug mga tambalanan kay tingali og gigamit lang kong kahimanan sa paglingla sa publiko.

Napahinumdoman ko sa makausa pa nganong nauso ug lisod barawon ang fake news.

* * *

Ang kalibotanong kabalaka sa pagkatap sa bag-ong kagaw nanukad sa nabistong pamakak sa China, nga nasakpang nitago sa unang mga kaso sa Severe Acute Respiratory Syndrome (SARS) niadtong 2002, maong wa dayon masagang hangtod nga nakatakod og 8,098 ka molupyo ug nakapatay og 774 sa 37 ka nasud.

Human sa pila ka semana nga pagpahiyos sa bag-ong suliran, niangkon ang China nga na-triple ang mga kaso (218 na gahapon gikan sa 62 lang niadtong Enero 17), nikatap na sa ubang bahin sa China (Beijing, Shanghai ug Shenzhen) ug silingang mga nasud (Japan, Thailand ug South Korea), upat nay namatay ug makatakod ang pasyente sa laing mga tawo.

* * *

Ang pagtago sa China sa kinatibuk-ang langyab sa sakit gikabalak-ang mosangpot sa mas paspas nga pagkatap sa kagaw karong weekend.

Kanus-a tulo ka bilyon ka biyahe sa tibuok China ang himuon sa mga mamauli sa ilang mga pamilya alang sa Chinese New Year.

Apan ang kabakakon sa China ug ang pagkatap na sa bag-ong coronavirus di makapatinuod sa iresponsableng paukyab nga ang mga pasyente gikan sa China nagsuroysuroy sa niaging Sinulog ug nanakod sa mga Sugbuanon.

* * *

leolastimosa@gmail.com

CHINA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with