Human sa Sinulog

Nakita nako ang gi post sa FB nga puno kaayo sa mga kandila ug mga buwak ang Magellan’s Cross nga kiosko. Daghan gyud seguro ang nangadto didto ug kay wala namay kadagkotan ila na lang gihulog ang ilang kandila didto. Kaniadto mga tuig 2010 seguro nahimong hawan pa kaayo ang maong luna, way trapik. Nakita ko kini sa mga post ni Nyor Jun Tupas.

May tawo pa ganing nagpas-an og dahon sa buli! Ug hawan ug malinawon ang tanan, dili sama karon nga puno kaayo sa mga sakyanan ug huot na kaayo ang trapiko, samot na tingali niadtong nagpadulong pa ang pangilin sa Balaang Bata.

Ang atong nasud matud pa, gisakop kuno ginamit ang krus ang espada. Daghan sa atong mga katigulangan ang niyukbo sa mga katsila, gumikan ba kaha sa kahadlok sa latigo apan daghan usab ang niyukbo gumikan sa Batang Jesus nga nahimong kabahin na gyud sa atong kinabuhi sulod sa hataas na nga panahon.

Ang Krus simbolo sa kang Kristong kadaugan ug kabahin na gyud sa atong pagtuo. Matag ampo nato anaa gyud ang Krus, matag dawat nato sa panalangin kita gipanalanginan ginamit ang formula Amahan, Anak ug Espiritu Santo dayon mohimo og pagkurus ang pari kanatong mga katawhan. Timaan lamang kini nga ang Krus dili gyud malayo sa atong kinabuhi. Mahinungdanong bahin gyud siya sa atong panaw sa pagtuo.

Hapit na ang 2021 diin saulogon nato ang ika 500 ka kasumaran sa Kristiyanismo. Magpasalamat kita niini gumikan sa maong kahigayonan nga gihatag kanato sa Dios. Dili man tuod sayon ang atong kasinatian uban sa mga Katsila apan sa laing bahin ang pagtuo nga ilang gitisok kanato ato pud untang ampingan sa gihapon. Ang mga kaparian ug mga misyonero nga naghago alang sa atong pagtuo ang nagsilbing sukaranan usab nga kita mismo sa tukmang higayon ang mobawos sa ilang kahago pinaagi sa paghimo sa atong mga kaugalingon nga mga misyonero usab.

Dili man tuod nato malatas ang daghang mga lasang sa laing dapit apan dinhi mismo sa ato gikinahanglanon nga atong imantala ang pagtuo dili lang sa pulong kondili usab sa atong binuhatan.  Ang Awit nga gitagik ni Monsenyor Cesar Alcoseba nagkanayon: “Ang sakayan nila midunggo dinhi, aron magmando ning yuta namo, apan nagbuot ka tipon kanila, aron ka maghari ning imong pinili! Senyor Santo Niño tudloi kami Ginoo, nga nagmahal kanimo.....