Utok ug Kasing Kasing sa Mayor

Usa na tingali sa challenging Sinulog celebration ang 2020 tungod sa mitumaw nga mga kontrobersya sama sa exclusivity issue sa usa ka cable based tv program nga nakigkontrata sa Sinulog Foundation Inc. bugti sa 800 mil pesos.

Napun-an pa kini sa kasabotan sa usa ka pribadong kompaniya ug SFI  nga sila lang exclusive nga makapamaligya sa ilang produkto bugti 2 milluon pesos.

Ikatulo ang clamping sa mga sakyanan nga gisupalpal usab sa mayor diin iyang gipatuman ang moratorium.

Maayo nalang kay gipangbalit-ad tanan ni Mayor Edgardo Labella human nakaani og mga negatibong reaksyon.

Hinuon dinhi nakita kun unsa ka bukas ang mayor sa pagpaminaw sa pulso sa kinabag-an.

Dili komo mayor siya, iya nalang paundayonan ang mga nasudlan nga palisiya sa iyang mga ginsakpan.

In fairness sa mayor ang mga nahitabo wala siya masayod kay kun nasayran pa niya dayon dili gyud mahitabo ang mga kontobersya.

Very clever ang lakang sa mayor nga makalusot dayon sa mga issue nga maka-jeopardize sa iyang liderato sa dakbayan kay dili lang utok kondili kasing kasing ang iyang gipatigbabaw kay kun kini ang magkuyog dili gyud siya mapahamak sa tinagalog pa.

Mas maayo unta kun dili lang kutob sa pagbali sa mga mga palisiya o kontrata kondili mas maayo kun ipasusi niya kini aron masayran unsay kasabotan duna man nga nahimo sa mga tawo sa iyang palibot.

Hinuon gipahibawo na niya nga human sa Sinulog ipasusi niya ang naasoyng mga kontrata ug dili na usab kuno subli pa nga mahitabo sa sunod nga mga selebrasyon.

Tinuod buotan si Mayor Labella ug maikogon apan angayan huna hunaon sa uban niyang mga tawo kun duna may plano nga mohimo og milagro dili gyud sila kalusot kay nbanggiitan ug utokan ang mayor nga dili mahimong maimpluwensyahan.

Tan-awon lang nila ang credentials o background niini kinsa kanhi opisyal sa anti-graft office nga wala gyud maduhig sa mga kahiwian, hinaut pa unta wala kini mausab.