Ginoo mitubag kanako pinaagi sa FB

Akong ipaambit ang personal nga kasinatian nga para kanako tinuod ang presensya sa Labawng Makagagahum Kinsa motubag gyud kanimo sa tanang panahon.

Niadtong Domingo gihilantan ang akong kamanghoran nga anak nga singko anyos nga si Francis John Paul, gipainom og tambalan apan gabalik balik ang hilanat.

Hangtod pagkasunod adlaw hinungdan nga gidala sa doktor ug giingnan lng obserbahan lang hangtod sa tulo ka adlaw. Sa akong kahiladman nabalaka ug gibati ko og tumang kahadlok nga basin dengue ang sakit sa bata ilabi na nga gasuka ug taas ang iyang hilanat. Mahadlok naman gud ko kung hilantan ang mga bata kay nakasinati naman akong eldest kaniadto sa balatian, maayo nalang kay giluwas sa Ginoo gikan sa peligro. Samtang taliwala sa akong kabalaka, murag down kaayo akong gibati nga dunay pagduda kun pamation ba kaha ang akong pangalyupo sa Ginoo nga daghan ra ba kaayo ko og pagkulang kay talagsa ra gani ko makasimba.

Aron mahupay ang akong kahingawa, nagpatukar ko sa youtube og Divine Mercy chaplet nga kanta ug Gosos sa Senyor Sto. Niño hangtod nga nakatulog ko samtang naggakos sa akong anak nga naunlan sa akong bukton.

Siguro nag damgo ko nga gaan kaayo ang gibati nga anaa sa lugar nga puti kaayo ang palibot.

Basin siguro sa musika nga gipatukar atol sa akong pagkatulog, apan nakamata ko nga naatol gyud sa first luminous mystery sa Rosaryo sa youtube kay padayon man ang pag play niini. Samtang nagkuha ko og body temperature sa akong anak miabli sad ko sa Facebook.  Nanglimbawot akong balhibo sa unang mensahe sa akong newsfeed nga nagkanayon “YOU ARE NOT READING THIS BY ACCIDENT. THIS IS YOUR CONFIRMATION THAT EVERYTHING IS GOING TO BE ALRIGHT. GOD IS MAKING A WAY FOR YOU RIGHT NOW”

Gikan kini sa usa ka Fb page nga dili gani nako konektado nga mi mi pop up lang sa akong newsfeed.

Nakaingon ko nga that instant gitubag sa Ginoo ang akong pangutana, gihupay Niya ang akong kahadlok.

Nakatuaw ako sa kauwaw nga gidudahan ang Iyang gugma kanako nga bisan sa mga pagkuwang Kaniya Iya gyud kong gihatagan og kasegurohan.

Salamat Ginoo nga giayo Nimo akong anak, wala lang nimo siya ayoha kun dili giayo mo usab ang akong pagtoo.

Viva Pit Senyor!