Pangwarta sa Sinulog

Tuig 1980 dihang gisugdan ang labing unang Sinulog Parade dinhi sa Sugbo pinaagi ni David Odilao Jr. nga kaniadto maoy pangulo sa Ministry of Sports and Youth Development (MYSD) dinhi sa Central Visayas.

Uban sa pagpakig-alayon ni anhing Titang Diola sa Barangay Mabolo nga maoy nagmugna sa orihinal nga sayaw sa Sinulog, ilang gidapit ang mga tunghaan sa Sugbo alang sa maong parade.

Nakadapit sa pagtagad sa kagamhanan sa dakbayan sa Sugbo ang maong kalihukan hinungdan nga nahukman ni kanhi mayor Florentino Solon nga himoon kining usa ka festival. Dinhi namugna ang Sinulog Foundation Inc. nga maoy gitugyanan sa tanang preparasyon pagpahigayon sa tinuig nga festival pasidungog sa Balaang Bata nga si Señor Santo Niño.

Sa sinugdan limitado lang sa Sugbo ang maong kalihukan. Bisan ang mga contingents kaniadto limitado lang sa mga tunghaan.

Apan sa pagpangligad sa katuigan nahimong inila ang Sinulog dili lang sa ubang dapit sa nasud kon dili lakip na sa ubang dapit sa kalibutan.

Daghan na nga mga contingents gikan sa ubang lalawigan ang mosalmot sa Sinulog ug gidugok na pud ang kalihukan sa mga langyaw matagtuig. Kini nahitabo tungod sa paningkamot sa mga unang opisyal sa SFI, labi pa ni anhing Juan Dodong Aquino, aron i-promote ang Sinulog.

Ug dili ikalimod ang dakong papel nga nahimo sa media sa Sugbo alang sa promotion sa Sinulog hinungdan nga nahimo kining inila sa pagkakaron.

Apan subo nga palandungon nga ang bag-ong mga tagdumala sa SFI daw sa nalimot sa nahimong tampo sa media alang sa Sinulog. Maoy nipasuwabi sa ilang galamhan ang kahakog sa kwarta nga hangtud ang pagpasundayag sa kalihukan buot nilang inegosyo.

Nakugang ang mga sakop sa media sa Sugbo dihang nasayran nga nipirma og kontrata ang SFI sa MyTV alang sa exclusive nga katungod sa pagbroadcast sa Sinulog Grand Parade.

Ang rason sa executive director sa SFI nga si Jojo Labella dugay na kunong panahon nga wala gyud makasapi ang foundation sa media coverage sa Sinulog. Ug wala pa ni siya layasi sa maayong panghuna-huna, dili ang media maoy utangan og kabubut-on sa SFI.

Kun buot hunahunaon ang SFI maoy dunay dakong utang kabubut-on sa media tungod sa dakong tabang niini alang sa promotion sa Sinulog hinungdan nga nahimo kining inila sa tibuok kalibutan.

Wala ba mosantop sa huna-huna sa mga opisyal sa SFI nga dili mamahimong ingon niini ka inila ang Sinulog kun dili pa tungod sa libre nga promotion nga gihatag sa media niini? Hinaut nga way laing mga transaksiyon gawas niini ang ilang nahuna-hunaan nga pangwartahon.