Bulilyaso sa preparasyon

Matud pa sa panultihon sa katiguwangan nga kun daghan ang mangamot sa kusina siguradong mapan-os ang imong sud-an.

Ug kini maoy atong nakita sa preparasyon sa Sinulog 2020. Daghan ang gustong mopapil, ambot unsay hinungdan, resulta nga apektado ang preparasyon.

Bisan giunsa’g paningkamot sa mga tigpasiugda nga tagoon gikan sa mga mata sa publiko ang mga bulilyaso sa preparasyon apan mosiwil ug di gyud kapugngan.

Unang namatikdan sa publiko nga nagkara-kara ug dunay problema sa preparasyon mao ang kalangay sa mga tickets.

Midagsa na ang mga pangutana asa mapalit ang ticket sa Sinulog apan wala pay tubag ang mga tigpasiugda tungod kay wala pa mahuman nila og imprinta.

Niadto lang usang adlaw nila nahuman ang tickets. Giangkon ni Val Sandiego, usa sa mga membro sa Sinulog Governing Board, nga dunay kalangan sa ilang schedule.

Ug nakabantay mo, wala kay makitang mga tarps diha sa mga poste sa suga sa center island sa Osmeña Boulevard sukwahi sa nanlabay’ng mga selebrasyon.

Basi sa kasayuran nga akong nahipos mao ang kalibog asa mangayo og pirmiso. Dunay duha ka mga organisasyon nga nalambigit sa preparasyon sa Sinulog karong tuiga.

Una mao ang naandan nga Sinulog Foundation Incorporated ug ang ikaduha mao ang bag-ong gitukod sa syudad nga Sinulog Governing Board. Mao ni hinungdan nganong daghan ang bulilyaso sa preparasyon.

Ang mahulagway nga labing dako nilang bulilyaso nga posibling naghatud og dakong risgo sa mga dancers mao ang kalangan sa trabaho sa stage.

Tiaw mo bay nagsugod na ang parada sa Sinulog sa Kabataan sa Lalawigan kagahapon apan ang mga trabahante nagpadayon pa sa pagpamintura sa sawog sa intablado.

Sa akong pagsuwat niini, 30 minutos nalang sa dili pa mangabot ang unang hugna sa mga contingents didto sa Cebu City Sports Center apan wala pa mahuman sa pagpamintura sa sawog sa entablado. Hinaut walay nadisgrasya sa mga dancers tungod kay basa pa ang pintura.